Llakiywan onqosqa kajkunata yanapana

¿Imatá ruwasunman?

Ujnin amigonchej chayri familiarninchej llakikusqanrayku onqosqa kashan chayqa, ichapis mana yachanchejchu imaynatachus yanaparinata. Jinapis llakiyninwan mana atipachikunanpaj yanaparisunchej chayqa, munakusqanchejta reparanqa. Imaynatachus chayta ruwanata qhawarina.

¿Imaynatá paykunata yanapasunman?

‘Allinta uyariyta yachana’ (SANTIAGO 1:19).

Amigonchej imatapis willariyta munawajtinchejqa sumajta uyarina. Amataj yuyanachu tukuy ima niwasqanchejman kutichinanchej kasqanta. Astawanqa payta sumajta uyarina, paymantataj tukuy sonqo llakikuna. Payta entiendenapaj kallpachakuna, ama juzganachu, nitaj qhawaranachu. Amigonchejqa llakisqa kashaspa ichapis mana parlanasta parlanman, chaymantaraj arrepientekunman (Job 6:2, 3).

‘Llakisqa kajkunata sonqochana’ (1 TESALONICENSES 5:14).

Ichapis amigonchejqa llakisqa kashan chayri ancha pisipaj qhawakun. Jina kajtenqa payta nina mayta munakusqanchejta, yanapariytataj munasqanchejta. Chayta ruwaspaqa imatachus ninanchejta mana yachaspapis, payta sonqochariyta, kallpachariyta ima atisun.

“Sumaj amigoqa tukuy tiempo munakuyniyoj” (PROVERBIOS 17:17).

Amigonchejman nina yanapariyta munasqanchejta. Kayta chayri jaqayta necesitasqanta yuyanamantaqa, paytapuni tapurina imaynatachus yanaparinata. Ichapis amigonchejqa mana willayta atiwasunchu imatapunichus necesitasqanta. Jina kajtenqa payman nisunman khuska puriykacharimunanchejta, imatapis rantipoj rinanchejta, wasinta llimphucharipunanchejta chayri waj imasta ruwaripunanchejta (Gálatas 6:2).

‘Pacienciayoj kana’ (1 TESALONICENSES 5:14).

Amigonchejqa ichapis wakin kutis mana noqanchejwan parlayta munanqachu. Jinapis payman nina: “Imamantapis parlayta munanki chayqa, willarillawanki”, nispa. Amigonchejqa llakiywan onqosqa kasqanrayku, imata ruwaspapis chayri imata nispapis sonqonchejta nanarpachiwasunman. Manachayrí qʼellirpakunman, phiñarpakunmantaj. Amigonchejta yanaparinapajqa mayta pacienciakuna, entiendenataj (Proverbios 18:24).

Llakisqa kajkunata yanaparina

Juanaa nin: “Kallpachakuni wajkunapaj sumaj amiga kanaypaj. Yachani amigaypa mana tukuy llakiykunasnintachu chinkachiyta atisqayta. Jinapis imatapis willariyta munawajtenqa sumajta uyarini. Wakin kutisqa chayllata necesitan” (Paypa amiganqa llakiywan onqosqa, sinchʼita llakikusqanraykutaj mana mikhunchu).

Ha-eun nin: “Ujnin amigayqa llakiykuna kajtinpis kusisqallapuni, maytataj munakuwan. Uj kuti wasinman wajyariwarqa, sumaj miskʼi mikhunitatataj waykʼuripuwarqa. Pay noqawan ajina kʼacha kasqanrayku, tukuy llakiyniyta willarikorqani. Chayqa maytapuni kallpachawarqa” (Paytaqa doctor nin sinchʼi llakiywan onqosqa kasqanta).

Jacob nin: “Pacienciakunapuni tiyan. Señoray phiñachinawanpaj jina imatapis ruwajtenqa, yuyarikuni mana paypa juchanchu kasqanta, manaqa llakiywan onqosqa kasqanrayku chayta ruwasqanta. Chayrayku mana phiñarpakullanichu, astawanqa paywan pacienciakuni” (Paypa señorantaqa doctor nin sinchʼi llakiywan onqosqa kasqanta).

Enrico nin: “Señorayqa tukuy imaymanamanta yanapawan, sonqochawantaj. Sinchʼita llakikuyta qallarejtiyqa mana imatapis a la fuerza ruwachiwanchu. Wakin kutistaj gustasqan imastapis niña ruwanchu. Señorayqa manchay kʼacha, allinniypipuni piensashan. Paytaqa mayta munakuni” (Payqa anchata llakikun).