¿Yacharqankichu?
¿Imaraykutaj Davidpa ejercitonpi forastero runas kallarqankutaj?
DAVIDPA ejercitonpeqa mana israelita qharisllachu karqanku, forasterospis kallarqankutaj. Wakenqa karqanku ammonita Zélec, hitita Urías, chantá moabita Itmá (1 Cró. 11:39, 41, 46).a Chaypi kallarqankutaj “keretitas, peletitas, guititaspis” (2 Sam. 15:18). Keretitaspis peletitaspis filisteoswan ujchasqasina karqanku (Eze. 25:16). Guititastaj filisteospa Gat llajtankupi tiyakorqanku (Jos. 13:2, 3; 1 Sam. 6:17, 18).
¿Imajtintaj David forastero runasta ejercitonpi japʼikorqa? Payqa sutʼita yacharqa payta mana wasanchanankuta, pero astawanqa Jehovata mana wasanchanankuta. Keretitasmanta, peletitasmanta parlaspa, The New Interpreterʼs Dictionary of the Bible libro nin: “Rey kashajtin Davidta mana allinchu rerqa chay kutispi chay runasqa nipuni wasancharqankuchu”, nispa. ¿Imaynapí chayta yachanchej? “Israelmanta tukuy runasqa” rey Davidta saqerparerqanku, “uj chʼajwaku runa karqa Seba sutiyoj” chayta qhatinankupaj. Keretitaswan, peletitaswantaj Davidta mana saqerparerqankuchu, yanaparqankutaj Seba oqharikusqanta tukuchinanpaj (2 Sam. 20:1, 2, 7). Waj kutipitaj wawan Adoniasñataj cuentanmanta rey kayta munarqa. Pero keretitaswan peletitaswanqa Davidta nipuni wasancharqankuchu, yanaparqankutaj wawan Salomón rey kananpaj. Paykunaqa yacharqanku Jehovaqa Salomonta ajllasqanta Davidpa cuentanmanta kamachinanpaj (1 Rey. 1:24-27, 38, 39).
Guitita Ittaipis forasterollataj karqa, paypis Davidta nipuni wasancharqachu. Davidpa wawan Absalonqa tatanpa contranta oqharikorqa, runaspa sonqontataj suwayta munarqa tatanpa cuentanmanta reyta churanankupaj. Chay kutipitaj, Ittaiwan 600 soldadosninwanqa Davidman kutikorqanku. Davidqa Ittaiman nerqa forastero kasqanrayku mana payrayku maqanakunanchu kasqanta. Ittaitajrí nerqa: “Kausaj Jehová Diospa sutinpi jurani, kausayniykiraykupis jurallanitaj: Maymanchá qan reyníy rinki chayman kay kamachiykipis rillanqataj, kausanaypajpis wañunaypajpis”, nispa (2 Sam. 15:6, 18-21).
Jehovaqa Davidta rey kananpaj ajllarqa, Ittaitaj payta mana saqerparerqachu.
Keretitas, peletitas, guititaspis forasteros karqanku, chaywanpis Jehovapi creerqanku cheqa Dios kasqanta yachasqankurayku, Davidtapis respetarqanku Jehová payta ajllasqanrayku. Davidqa maytachá agradecekorqa ajina runas paywan kasqankumanta.
a Deuteronomio 23:3-6 versiculospi nerqa ammonitaspis moabitaspis nipuni Israel nacionman yaykuyta atisqankuta. Chaywanqa nisharqasina mana israelitas jinapunichu kayta atisqankuta. Chaywanpis mana nerqachu israelitaswan mana ujchakuyta atisqankuta, nitaj paykunawan tiyakuyta atisqankutapis. Perspicacia para comprender las Escrituras nisqa libropi “Ammonitas” nisqaman yaykuy, chaypitaj maskʼay “Se casan con israelitas” nisqata.