‘Espíritu santonejta ujchasqallapuni kana’
APÓSTOL Pabloqa Efesomanta cristianosta nerqa: “Purajmantataj munakuywan aguantanakuychej. Chantapis qankunapura allinta kausakuychej. Ujchasqallapuni kanaykichejpajtaj mayta kallpachakuychej. Imaraykuchus espíritu santonejta ajina ujchasqa kashankichej”, nispa (Efe. 4:2, 3).
Pablo nerqa ‘espíritu santonejta ujchasqa kasqanchejta’. Chaywanqa nisharqa Diospa espíritu santon ujchasqa kanapaj yanapawasqanchejta. Jinapis Pablo nillarqataj chaypaj kallpachakuna kasqanta. ¿Pikunataj kallpachakunanku tiyan? Sapa cristiano kallpachakunanchej tiyan ‘espíritu santonejta ujchasqallapuni kananchejpaj’.
Pillapis uj mosoj autota regalawasqanchejpi piensarina. ¿Pitaj chay autota cuidanan tiyan? Noqanchej, ¿icharí? Mana allinta cuidasqanchejrayku chay auto fregarpakojtin mana regalawarqanchej chaytachu juchachasunman.
Cristianos ujchasqa kasqanchejpis Diosmanta uj regalo. Jinapis sapa ujninchej kallpachakunanchej tiyan ujchasqallapuni kanapaj. Chayrayku sichus uj hermanowan chayri uj hermanawan mana allintachu apanakunchej chayqa, kayta tapurikusunman: “¿Tukuy atisqaytachu kallpachakushani congregación ujchasqallapuni kananpaj, chay hermanowantaj allinyakunaypaj?”, nispa.
‘UJCHASQALLAPUNI KANAYKICHEJPAJ MAYTA KALLPACHAKUYCHEJ’
Qhawarinchej jina Pablo nerqa ujchasqallapuni kanapaj wakin kutis maytapuni kallpachakunanchej kasqanta. Chaytataj astawanraj ruwananchej tiyan uj hermano phiñachiwajtinchej. Jinapis ujchasqallapuni kanapaj, ¿paywan parlananchejpunichu tiyan? Mana. Kayta tapurikusunman: “Paywan parlajtiy, ¿chay problemata allinchasajchu chayri jatunyaykuchillasajchu?”. Wakin kutisqa aswan allin kanman chayta qonqapuy, nisunman perdonay (Pro. 19:11; Mar. 11:25).
“Paywan parlajtiy, ¿chay problemata allinchasajchu chayri jatunyaykuchillasajchu?”.
Pablo yuyaycharqa: “Purajmantataj munakuywan aguantanakuychej”, nispa (Efe. 4:2). Chayqa niyta munanman “wajkunata imaynachus kanku ajina pachitanta munakuy” (Comentario para exégesis y traducción. Carta a los Efesios, Mariano Ávila Arteaga). Nisunman noqanchej jina pantaj runasllataj kasqankuta mana qonqakunanchejchu tiyan. Tukuypis kallpachakunchej “mosoj runa” kaywan pʼachallikunapaj (Efe. 4:23, 24). Pero ni pipis tukuy imapi allintapuni ruwayta atinchejchu (Rom. 3:23). Chayta mana qonqasunchu chayqa, aswan facilta wajkunata aguantayta atisun, perdonasuntaj. Ajinamanta ‘espíritu santonejta ujchasqallapuni kasun’.
Uj hermanowan problemanchejta allinchaspa, chayta sonqollanchejpi pasachejtinchejpis, “ujchasqallapuni” kayta atinchej. Efesios 4:3 versiculopi griegopi rikhurej ‘ujchasqa’ palabrataqa, Colosenses 2:19 versiculopi ‘anku’ palabraman traducikun. Ankusninchejqa sumaj duros kanku, tullusninchejtataj sumaj ujchasqata japʼinku. Ajinallatataj hermanosninchejwan allinta kausakuspa, paykunatataj munakuspaqa, ima problemita kajtinpis paykunawan ujchasqallapuni kayta atisun.
Chayrayku uj hermano sonqonchejta nanachiwajtinchej, rabiachiwajtinchej chayri phiñarpachiwajtinchej payta qhawaranamantaqa, khuyakuna (Col. 3:12). Pantaj runas kasqanchejrayku noqanchejpis ichá wajkunaj sonqonkuta nanacherqanchej. Chayta yuyarikuytaj yanapawanchej ‘espíritu santonejta ujchasqallapuni kanapaj’ kallpachakunanchejpaj.