Jallpʼaqa saykʼusqa kashan | ¿Imatá Biblia nin?

Grupo Intergubernamental de Expertos sobre el Cambio Climático nisqa, 4 de abril de 2022 fechapi uj informeta orqhorqa. Chay informemanta parlaspa secretario general de las Naciones Unidas nisqamanta António Guterres nerqa: “Runasqa jallpʼata anchataña saykʼuchinchej. Chayrayku jatuchaj llajtaspi inundaciones tiyan. Wakin lugarespi manchayta ruphan. Waj lugarespi jatuchaj muyoj wayras tiyan. Waj ladospi yaku pisishan. Chantapis imaymana plantas, animales ima uj millón jina chinkapunku. Kayqa mana cuentollachu, nitaj runasta mancharichinaypajchu nishani. Chayta ciencia sutʼinchawanchej, ajinallapunitaj kanqa sichus gobiernos mana cambianqankuchu imaynatachus jallpʼamanta orqhosqanku imasta apaychashasqankuta chayqa”, nispa.

Kay 15 de junio de 2022 fechapi, “Yellowstone lugarpi inundaciones manchay llakiy chayamunanta rikuchishan” nisqa noticiapi, The New York Times periódico nerqa: “Cientificosqa nishanku aswan qhepa wataspi, [Estados Unidospi] jallpʼa manaña ñaupajta jinachu kasqanrayku casi tukuynin 423 parques nacionalespi astawan calor yapakunanta. Chaytaj Bibliapi sinchʼi castigosmanta parlakusqanman rijchʼakun. Chay imas kanku: nina, inundaciones, chhullunkas chullurapusqan, marpi yakus yapakusqan, sinchʼi calor kasqan ima”, nispa.

Kay tukuy imas, ¿allinchakuy atikunmanchu? Atikunman chay, ¿pitaj allinchanman? Biblia imatachus nisqanta qhawarina.

Jallpʼanchejta pierdechinanku karqa

Bibliaqa nin ‘jallpʼata pierdechejkunata’ Dios tukuchinanta (Apocalipsis 11:18). Kay versiculomanta yachakunchej kay kinsa imasta:

1. 1. Runaspa ruwasqanku jallpʼata pierdechinanta.

2. 2. Jallpʼata runas pierdechisqanku tukukapunanta.

3. 3. Dioslla allinchanqa jallpʼata pierdechisqankuta, manataj runaschu.

Jallpʼaqa aswan qhepaman allin kanqa

Bibliaqa nin: “Jallpʼatajrí wiñaypaj kallanqapuni”, nispa (Eclesiastés 1:4). Arí, jallpʼapeqa runas tiyakullanqankupuni.

• “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Salmo 37:29).

Jallpʼanchejqa imaynachus qallariypi karqa ajinaman tukonqa.

• “Chʼin jallpʼawan tʼajra jallpʼawanqa kusikonqanku, chʼaki pampapis kusikonqa, azafrán tʼika jinataj tʼikarenqa” (Isaías 35:1).