¿Qolqechu juchayoj tukuy ima sajra kajmanta?
Biblia nin
Mana. Bibliaqa mana ninchu, tukuy ima sajra kajqa qolqerayku rikhurisqanta. Nillataj ninchu qolqeyoj kayqa jucha kasqanta. Wakin runasqa, Bibliapuni chayta nisqanta ninku. Jinapis chayqa mana jinachu. Astawanpis Bibliaqa nin: “Qolqeta munakoyqa tukuy imaymana sajra kajpa saphin”, nispa (1 Timoteo 6:10).
¿Imatá Biblia qolqemanta nin?
Bibliaqa niwanchej, qolqeta allinta apaykachajtinchej yanapawasqanchejta, “jarkʼakuna escudo” jinataj kasqanta (Eclesiastés 7:12, Diosmanta Qhelqasqa). Chantá nillantaj, qolqenwan wajkunata yanaparejtaqa allin rinanta (Proverbios 11:25).
Jinapis Bibliaqa nillantaj, mana qolqepi yuyaspallachu kausananchejta. Hebreos 13:5 nin: “Kausayniykichejpi amapuni qolqemanta wañusqa kaychejchu. Astawanpis imaschus kapusunkichej chaywan kusisqa kaychej”, nispa. ¿Imatá chay niyta munan? Kausanapaj qolqeta necesitajtinchejpis, mana chaychu ñaupajpi kanan kasqanta. Chayrayku mikhunayoj, ropayoj, cuartitoyoj ima kaspaqa, kusisqa kausakunanchej tiyan (1 Timoteo 6:8).
¿Imaraykutaj qolqeta munakuy mana allinchu?
Imaraykuchus qolqeta munakojkunaqa, chayri qolqemanta wañusqa kajkunaqa, mana wiñay kausayta japʼenqankuchu (Efesios 5:5). ¿Imaraykutaj? Imaraykuchus qolqeta munapayayqa, santosta yupaychaywan ninakun (Colosenses 3:5). Chantapis qolqeta munakojkunaqa, qolqeta japʼinankurayku ima juchatapis ruwallanku. Chayrayku Proverbios 28:20 nin: “Pichus usqhayllata qhapajyayta munajtaj juchata ruwanqapuni”, nispa. Ajinapunitaj, runasqa qolqerayku runa masinkuta engañanku, waqachinku, wañuchinku, waj sajra imasta ima ruwanku.
Mana chay imasta ruwajtinchejpis, qolqeta munakuspaqa imaymana llakiykunapi rikhurisunman. Biblia nin: “Qhapajyaytapuni munajkunarí, juchaman urmanku, trampasmantaj. Paykunaqa imaymana pierdechej mana allin munapayaykunawan chʼipaykuchikunku, chaywantaj mana allinman chayanku”, nispa (1 Timoteo 6:9).
Bibliaj nisqanta ruwayqa allinninchejpaj
Qolqerayku Diosta mana kasukusunchu chayqa, imatapis ruwarpallasun. Paytaj niña allinpajchu qhawawasun. Jinapis Diosta tukuy atisqanchejta kasukojtinchejqa, pay niwanchej: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa (Hebreos 13:5, 6). Chantapis nillawanchejtaj: “Cheqan runaqa ashkha bendicionesta japʼenqa”, nispa (Proverbios 28:20).