Isaías 41:10 | “Ama manchachikuychu, imaraykuchus noqaqa qanwampuni kashani”

“Ama manchachikuychu, noqa qanwan kashani. Ama llakikuychu, noqa Diosniyki kani. Noqa kallpachasqayki, noqa yanapasqayki. Justiciata ruwaj paña makiywan japʼisqayki” (Isaías 41:10, Diospa Palabran).

“Qanqa ama manchachikuychu, imaraykuchus noqaqa qanwampuni kashani. Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj; justiciata ruwaj paña makiywan sayachillasqaykipuni” (Isaías 41:10, Diosmanta Qhelqasqa).

¿Ima niytá munan Isaías 41:10?

Jehováa Diosqa payta tukuy sonqo sirvejkunata, ima llakiypi rikukojtinkupis yanapanqapuni.

“Noqa qanwan kashani”. Jehovaqa kamachisninman nin, ama manchachikunankuta. Imaraykuchus payqa paykunawan kashan. Payqa yachan kamachisninta imachus llakichisqanta. Chantapis mañakuyninkuta uyarin. Diosqa paykunaj qayllankupipis kashanman jina (Salmo 34:15; 1 Pedro 3:12).

“Noqa Diosniyki kani”. Jehovaqa kamachisninta sonqochan, ñaupaqenpi allinpaj qhawasqa kasqankutataj yuyarichin. Chayrayku kamachisnenqa mana iskayrayankuchu ima kajtinpis pay cuidananmanta (Salmo 118:6; Romanos 8:32; Hebreos 13:6).

“Noqa kallpachasqayki, noqa yanapasqayki. Justiciata ruwaj paña makiywan japʼisqayki”. Jehovaqa kay kinsa imasta kamachisninman nerqa, pay yanapananmanta mana iskayrayanankupaj. “Paña makiywan japʼisqayki” nispaqa, imapichus yanapata necesitanku chaypi yanapanantapuni nisharqa. Diosqa kamachisninmanta mayqellanpis urmajtin paña makinwan aysarin (Isaías 41:13).

Diosqa kamachisninta Bibliawan yanapan, kallpachan ima (Josué 1:8; Hebreos 4:12). Bibliaj yuyaychaykunasnenqa mayta yanapawanchej imamantapis pisichikojtinchej, onqosqa kajtinchej chayri pillapis familianchejmanta wañupojtin (Proverbios 2:6, 7). Chantapis Jehovaqa espíritu santonwan chayri atiyninwan kamachisninta yanapan ima llakiy kajtinpis sumajta yuyaychakunankupaj, manataj anchata llakikunankupaj (Isaías 40:29; Lucas 11:13).

Isaías 41:10 ñaupaqenpi, qhepanpi kaj versículos

Isaías 41:10 versiculopi imatachus Dios nisqanqa, payta tukuy sonqo sirvej judiosta maytachá yanaparqa. Imaraykuchus paykunaqa Babiloniaman presos apasqa karqanku. Judíos kacharichisqa kananku qayllata imachus kananmanta, ¿imatataj Jehová nerqaña? Pay nerqaña Babiloniata, muyuyninpi kaj nacionestapis, uj enemigo chinkachinanmanta parlaykuna uyarikunanta (Isaías 41:2-4; 44:1-4). Chayta uyarispa Babiloniamanta kajkuna, muyuyninpi nacionespis manchariywan kharkatitisharqanku. Judiostajrí yacharqanku Jehová jarkʼananta chayrayku mana manchachikusharqankuchu. Jehovaqa paykunaman kinsa kutita nerqa: “Ama manchachikuychu”, nispa (Isaías 41:5, 6, 10, 13, 14).

Jehovaqa Isaías 41:10 versiculota qhelqacherqa payta tukuy sonqo yupaychaj judiospaj. Paykunaqa Babiloniapi presos kasharqanku. Jinapis chay qhelqachisqanqa kay tiempopipis kamachisninta yanapashallantaj (Isaías 40:8; Romanos 15:4). Jehovaqa ñaupa tiempopi kamachisninta yanaparqa, kay tiempopipis yanapashallantaj.