Apocalipsis 21:4 | “Payqa tukuy waqayta ñawisninkumanta pichanqa”

“Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña” (Apocalipsis 21:4, Diospa Palabran).

“Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu” (Apocalipsis 21:4, Diosmanta Qhelqasqa).

¿Ima niytá munan Apocalipsis 21:4?

Diosqa mana runaspa llakiynillankutachu chinkachinanta nin, manaqa imaschus chay llakiykunata rikhurichisqantapis.

“Payqa ñawisninkumanta tukuy waqayta pichanqa”. Kay versiculomanta ñaupaj kaj parteqa imatachus Jehováa ñaupajtaña nisqanta sutʼinchashan. Chaytataj profeta Isaías qhelqarqa: “Diosqa tukuypa uyasninkumanta waqayta pichanqa”, nispa (Isaías 25:8; Apocalipsis 7:17). Kay palabrasqa reparachiwanchej familiaresninku wañupusqankurayku waqajkunata chayri waj imasrayku sufrejkunata Dios mayta munakusqanta.

“Manañataj wañuy kanqachu”. Diosqa niwanchej wañuyta chinkachinanta, wañuyrayku runas waqasqankutapis tukuchinanta. Chantapis wañusqasqa kausarimonqanku (1 Corintios 15:21, 22). Ajinapitaj wañoyqa wiñaypaj “chinkachisqa kanqa” (1 Corintios 15:26).

“Nitaj llakiypis, nitaj waqaypis, nitaj nanaypis” kanqachu. Diosqa mana niwanchejchu runas manaña nanayta sientenanchejta. Runastaqa imanchejpis nanawanchej mana wañuy patapi kanapaj chayri imamantapis cuidakunapaj. Astawanpis Diosqa niwanchej jucharayku kaj nanayta,b llakiyta ima chinkachinanta, runaspis manaña pantananchejta (Romanos 8:21, 22).

“Ñaupaj kaj imasqa chinkapunña”. Kay versiculomanta qhepa palabrasqa rikuchiwanchej kausayninchejqa manaña kay tiempopi jinachu kananta. Uj libro nin: “Ñaupaj kausaypeqa wañuy, nanay, waqay, phutiy ima kaj. Tukuy chaytaj mosoj kausaypeqa chinkaponqa”, nispa. Chaypacha runasqa kay jallpʼapi wiñaypaj kausakusunchej ni imamanta llakikuspa, Dios munasqanman jinataj (Génesis 1:27, 28).

Apocalipsis 21:4 ñaupaqenpi, qhepanpi kaj versículos

Apóstol Juanqa capítulo 21 qallariyninpi nin, mosqoypi jina “uj mosoj cielota, uj mosoj jallpʼatawan” rikusqanta (Apocalipsis 21:1). Juanqa chayta nispa mana cielomantapunichu, nitaj jallpʼamantapunichu parlasharqa, astawanpis chaywan parlasharqa imaschus cambiasqata cambiananta Bibliapi nikorqaña chaymanta (Isaías 65:17; 66:22; 2 Pedro 3:13). Chay ‘mosoj cieloqa’ Diospa churasqan Gobierno, chay Gobiernotaj tukuy gobiernospa cuentanmanta kamachenqa. Chay Gobiernoqa kamachenqa uj ‘mosoj jallpʼata’, nisunman kay jallpʼapi tiyakoj cheqan runasta (Isaías 65:21-23).

¿Imaraykutaj ninchej Juan mosqoypi jina rikusqan kay jallpʼapi juntʼakunanta? Uj kaj, Diosqa ñaupajta nin: “Diospa toldonqa runas chaupipi kashan”, nispa (Apocalipsis 21:3). Diosqa runasman chayta nishan, manataj cielopi tiyakoj angelesmanchu. Iskay kaj, Juan imatachus mosqoypi jina rikusqanman jinaqa, ‘manaña wañuy kanqachu’ (Apocalipsis 21:4). Wañoyqa mana jaykʼajpis cielopi karqachu, manachayqa kay jallpʼallapi tiyan (Romanos 5:14). Chayrayku ninchej kay versiculoqa imaynachus kausay kay jallpʼapi kananmanta parlashasqanta.

Apocalipsis libro imasmantachus parlashasqanta yachanaykipaj kay videota qhawariy.