VERSICULOSMANTA SUTʼINCHAYKUNA
Proverbios 17:17 | “Uj kawsaqeqa tukuy tiempopi munakuyniyoj”
“Sumaj amigoqa tukuy tiempo munakuyniyoj, llakiy kajtintaj uj hermanopis kanman jina yanapakun” (Proverbios 17:17, Diospa Palabran).
“Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj” (Proverbios 17:17, Diosmanta Qhelqasqa).
¿Ima niytá munan Proverbios 17:17?
Uj sumaj amigomanqa tukuy imata confiasunman. Payqa familianchejmanta ujnin hermanonchej jina, munakuyniyoj, nitaj saqerpariwanchejchu, astawanraj mana allin riwajtinchej.
“Sumaj amigoqa tukuy tiempo munakuyniyoj”. Kay palabrasqa kay jinata traducikullanmantaj: “Amigos kajkunaqa munanakunkupuni”. Hebreo parlaypi “munakuy” palabrapaj oqharikusqan palabraqa, mana munakuyllatachu niyta munan, manaqa ruwasqanchejwan tukuy sonqo munakusqanchejta rikuchinata (1 Corintios 13:4-7). Ajinata munanakoj amigosqa amigosllapuni kanku wakin imas mana allinchu llojsejtinpis, mana allinta yachaspalla imata parlarpajtinkupis chayri kausayninkupi problemas kajtinpis. Chantapis perdonanakunkupuni (Proverbios 10:12). Chantá envidianakunankumantaqa, mayqenninkutapis allin rejtin kusikunku (Romanos 12:15).
‘Sumaj amigoqa llakiy kajtin uj hermanopis kanman jina yanapakun’. Uj familiapeqa hermanospura mayta munanakunku. Kay versiculopitaj chay jina munakuymanta parlashan, uj sumaj amigoqa uj hermano jina kasqanta, llakiypi kaj amigonta yanapananpajtaj tukuy imata ruwasqanta ninanpaj. Chantapis problemas kajtenqa mana munakuyninku pisiyapunchu astawanqa sinchʼiyan. Imajtinchus problemas kajtenqa purajmanta astawan munanakunku, astawantaj respetanakunku.
Proverbios 17:17 ñaupaqenpi, qhepanpi kaj versículos
Proverbios libropeqa pisi palabrasllapi sumaj yuyaychaykuna tiyan, chaytaj leejkunata mayta tʼukurichin. Kay Proverbios libromanta casi tukuyninta rey Salomón qhelqarqa, chaytaj hebreo yarawipi chayri poesiapi qhelqasqa kashan. Hebreo poesiasqa, mana kikin palabraswan tukuychakoj takiykuna jinachu. Astawanpis kikin imasmanta chayri rijchʼakoj imasmanta parlan. Chay jina poesiastaqa, ñaupaj kaj parteta, qhepa kaj parteta leeytawanrajpuni astawan entiendekun. Proverbios 17:17 versiculotaj chay jina poesía kashan. Wakin kutistaj hebreo poesiasqa uj imata oqharispa contranpi kaj imatawanpuni oqharin, chay jina poesiataj Proverbios 18:24 versiculopi kashan. Chaypi nin: “Wakenqa amigos kashaspapis sajra imasta ruwanakunku. Jinapis wakin amigosqa hermanonchejmantapis aswan munakuyniyoj kanku”, nispa.
Salomonqa Proverbios 17:17 versiculota qhelqashaspa, ichapis piensasharqa tatan David, Jonatanwan sumaj amigos kasqankupi. Jonatanqa rey Saulpa wawan karqa (1 Samuel 13:16; 18:1; 19:1-3; 20:30-34, 41, 42; 23:16-18). Davidwan Jonatanwanqa mana hermanoschu kaspapis, hermanosmanta nisqa astawanraj munanakorqanku. Chayrayku Jonatanqa amigon Davidrayku kausaynintapis wañuy pataman churarqa.a
Proverbios libro imasmantachus parlashasqanta yachanaykipaj kay videota qhawariy.
a “Unidos por una gran amistad” nisqa yachaqanata leeriy.