¿IMATÁ RUWASUNMAN MANA ANCHATA LLAKIKUNAPAJ?

¿Imaynatá yachanchej ancha llakisqa kashasqanchejta?

Cuerponchejqa yachan imachus mana allin kashasqanta. Chaytataj yachan ñojtunchej hormonas nisqanejta willachisqanrayku. Chayraykutaj tukuy ukhunchej mana allintachu funcionan, nillataj sonqonchejpis, pulmonesninchejpis. Musculosninchejpis matʼiyapun. Jinamanta cuerponchejqa wakichisqaña imachus mana allin kashasqanta reparachinawanchejpaj. Llakiykunasninchej pisiyajtintaj, cuerponchejpis maychus kasqanman jina funcionayta qallarin.

LLAKIKOYQA WAKIN KUTI ALLIN WAKIN KUTITAJ MANA

Cuerponchej imachus mana allin kashasqanta willawasqanchejrayku yachanchej imatachus ruwananchejta. Llakisqa kashasqanchejtaqa ñojtunchejraj yachan. Chayrayku wakin kuti llakikoyqa yanapawanchej imatapis usqhayllata ruwanapaj. Chantapis yanapallawanchejtaj imatachus ruwayta munasqanchejta juntʼanapaj chayri allinta ruwanapaj. Arí, yanapawasunman uj examenta allinta qonapaj, trabajota conseguinapaj chayri allinta pujllanapaj.

Chaywanpis llakisqallapuni kayqa mana yanapawanchejchu. Imajtinchus cuerponchej mana allin kajtenqa onqoykusunman, phiñasqalla kasunman, llakikusunman, imatapis qonqallasunman, manchachikusunmantaj. Wajkunatapis ichá imatapis nirpallasunman. Llakisqallapuni kaspaqa wakin viciosman qokusunman, anchatataj mikhusunman. Chantapis depresionwan onqoykusunman, saykʼusqalla purisunman chayri wañuchikuyta ima munasunman.

Mana tukuytachu imapis kikinta llakichiwanchej. Chaywanpis anchata llakikuspaqa tukuy imamanta onqoykusunman.

ANCHATA LLAKIKOYQA MANA CUERPONCHEJTA YANAPANCHU

Sistema nervioso nisqa

Sistema nervioso nisqaqa adrenalina, cortisol nisqa hormonasta rikhurichin. Ajinamantataj sonqonchej apuritata funcionan, yawarninchejpis miskʼiyarpan, jinamanta imachus mana allin kashasqanta reparanchejpacha. Anchata llakikuspaqa:

usqhayllata phiñarpakusunman, depresionwan onqosunman, umanchej nanawasunman, nitaj puñuytapis atisunmanchu

Sistema musculoesquelético nisqa

Musculosninchej matʼiyarpasqanqa mana imanarpakunapaj yanapawanchej. Anchata llakikojtinchejqa:

ukhunchej nanawasunman, umanchej nanawasunman, calambres ima japʼiwasunman

Sistema respiratorio nisqa

Usqhayllata samajtinchejqa ashkha oxígeno cuerponchejman yaykun. Anchata llakikuspaqa:

agitakusunman, mana allintachu samasunman, tukuy imamantataj manchachikusunman

Sistema cardiovascular nisqa

Sonqonchejqa usqhayllata funcionan yawar tukuy cuerponchejman chayananpaj. Venasqa rakhuyantaj ñañuyantaj maypichá cuerponchej yawarta necesitan chayman yawarta chayachinanpaj, por ejemplo musculosninchejman. Anchata llakikojtinchejqa:

japʼiwasunman infarto, presión alta, ñojtunchejmanpis mana yawar chayanmanchu

Sistema endocrino nisqa

Glándulas nisqaqa adrenalina chantá cortisol nisqa hormonasta rikhurichin, chaytaj cuerponchejta yanapan llakiy kajtin imallatapis ruwananchejpaj. Higadonchejtaj yawarninchejta miskʼiyachin, ajinamantataj mana usqhayta saykʼunchejchu. Anchata llakikuspaqa:

diabeteswan onqoykusunman, ima onqoypis japʼillawasunman, mana imallamanta phiñakusunman chayri anchata wirayasunman

Sistema gastrointestinal nisqa

Mikhojtinchejpis wijsanchej mana allintachu funcionanman. Anchata llakikojtinchejqa:

vomitaylla chayawasunman, diarrea japʼiwasunman, estreñiykuwasunman ima

Sistema reproductivo nisqa

Casadosqa llakisqa kashaspa mana qhariwarmi jina puñuykuyta munankumanchu, puñuykuspapis mana kusisqachu kankuman. Anchata llakikuspaqa:

qharisqa mana atinkuchu warminkuwan puñuykuspa imatachus ruwananku kashan, chayta ruwayta, warmispatapis killanpi yawarninku mana normalchu kanman