1. ¿Dioschu juchayoj runa ñakʼarinanpaj?

¿Imaraykutaj chayta yachananchej tiyan?

Ashkha runasqa Diosta qhesachanku Dios ñakʼarinanchejpaj juchayoj kasqanta yuyasqankurayku.

Kaypi piensariy

Religionta kamachejkunaqa yachachinku Dios juchayoj kasqanta ñakʼarinanchejpaj. Wakenqa ninku:

• Desastres kasqan Diospa castigon kasqanta.

• Wawas wañusqankuta Dios cielopi angelitosta necesitasqanrayku.

• Guerraspi atipanankupaj Dios yanapasqanta.

Jinapis, ¿religionta kamachejkuna Diosmanta sajra kajta yachachinkumanchu? ¿Paykunata Dios allinpajchu qhawanman?

Bibliaj nisqan

Diosqa mana juchayojchu ñakʼarinanchejpaj

Dios runasta ñakʼarichinman chayqa, mana imaynachus kasqanman jinachu ruwashanman. Imajtinchus Bibliaqa nin:

‘Tukuy ñankunanqa cheqanpuni. Payqa cheqanmin, cheqa kajta ruwajtaj’ (DEUTERONOMIO 32:4).

“Ama yuyallaychejpischu Tukuy Atiyniyoj Diosqa ima sajratapis ruwasqanta, chayrí ima mana cheqan kajtapis” (JOB 34:10).

‘Tukuy Atiyniyojqa justiciata mana qʼewinchu’ (JOB 34:12).

Diosqa paymanta pantasqata yachachej religionesta, mana allinpajchu qhawan

Diosqa qhesachan ñakʼarinanchejpaj pay juchayoj kasqanta yachachej religionesta, qhesachallantaj guerrasta, sajra imasta apoyaj religionestapis.

‘Chay tukuy imastachus profetas sutiypi nishanku, chayqa llullalla. Mana noqaqa chay profetasta kachamunichu, nitaj kamachinichu, ni parlallanipischu paykunawanqa. Chay sutʼinchasqankoqa llulla, sonqonkupi musphasqa yuyasqankuman jinalla parlanku’ (JEREMÍAS 14:14).

Jesusqa religionta kamachejkunata puraj uyas kasqankuta nerqa

“Mana tukuy pikunachus ‘Señor, Señor’ niwajkunachu cielopi kaj Gobiernoman yaykonqanku. Manachayqa, cielopi kashaj Tataypa munayninta ruwajkunalla yaykonqanku. Chay pʼunchaypeqa ashkhas niwanqanku: ‘Señor, Señor, ¿manachu sutiykipi profetas jina parlarqayku, sutiykipitaj supaykunata qharqorqayku, sutillaykipitaj ashkha milagrostapis ruwarqayku?’, nispa. Noqataj paykunaman nisaj: ‘Ni jaykʼaj rejserqaykichejchu. Riychej kaymanta, mana allin imasta ruwajkuna’, nispa” (MATEO 7:21-23).