5. ¿Ñakʼariy tukukonqachu?
¿Imaraykutaj chayta yachananchej tiyan?
Ñakʼariy chinkananta creespaqa, allin kausayta suyakusunman, Diosmantapis maychus kajta yuyasunman.
Kaypi piensariy
Runasqa ñakʼariyta chinkachiyta mayta munankuman. Jinapis mana atinkuchu. Imajtinchus mana atisqankuta qhawarina.
Imaymana jampista ruwajtinkupis:
May chhika runas corazonninkumanta onqoykuspa wañushallankupuni.
Sapa wata may chhika runas cancerwan wañunku.
Doctor David Bloom, uj revistapi nerqa: “Runasqa millay onqoykunawan onqoshallankupuni. Wakin onqoykunaqa kunallanraj rikhurinku, wakintaj watejmanta rikhurimushanku”, nispa.
Qhapaj suyuspipis:
Sapa wata may chhika wawas wañunku. Astawanqa wajcha lugarespi tiyakoj wawas.
May chhika runasqa mana llimphu lugarespichu tiyakunku, nitaj bañosninkupis kanchu.
May chhika runasqa mana agua potableyoj kanku.
Runas ima derechosniyojchus kasqankuta astawan yachaspapis:
Ashkha suyuspeqa runasta suwas waj ladoman apaspa vendeshallankupuni. Naciones Unidasmanta uj informe nisqanman jinataj, chayta ruwajkunata autoridadesqa mana imanankuchu, ichapis mana yachasqankurayku chayri mana wakichisqachu kasqankurayku.
ASTAWAN YACHANAYKIPAJ
¿Imastataj Diospa Gobiernon ruwanqa? nisqa videota Internetpi jw.org nisqapi qhaway.
Bibliaj nisqan
Diosqa llakikuwanchej
Payqa ñakʼarisqanchejmanta llakikun.
“Payqa wajchaspa ñakʼariyninkuta mana qhesachanchu, nitaj millachikunchu. Mana paykunamanta pakakunchu, manachayqa qhaparikojtinku, uyarimpuni” (SALMO 22:24).
“Tukuy llakiyniykichejta Diospa makinman saqeychej, imaraykuchus payqa qankunamanta llakikun” (1 PEDRO 5:7).
Mana wiñaypajchu ñakʼarisunchej
Bibliaqa nin Dios ñakʼariyta chinkachinanta.
‘Diosqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis’ (APOCALIPSIS 21:3, 4).
Diosqa imaschus ñakʼarichiwasqanchejta chinkachenqa
Bibliaqa nin chayta Dios Gobiernonnejta ruwananta.
‘Janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Chay atipaj reinotajrí wiñaypaj sayanqa’ (DANIEL 2:44).