13 yachachiy

Abraham... Diospa munasqa masin

WAKIN runaqa Jatun Paramanta qhipaman, Ur nisqa llaqtapi tiyakamurqanku. Urqa sumaq wasisniyuq juk qhapaq llaqta karqa. Ur llaqtapi Babelpijina, runaqa lantista yupaychaq kanku. Urmanta, Babelmanta runaqa, mana Noejinachu nitaq wawan Semjinachu Jehovata yupaychaq kanku.

Noeqa Jatun Paramanta 350 watanman wañupurqa. Chaymanta iskay watanman kay dibujopi rikhuriq runa nacekurqa. Kay runaqa Diosnichikpaq may kʼacha karqa. Sutintaq Abraham karqa. Pay Ur llaqtapi familianwan tiyakurqa.

Jehová juk pʼunchay Abrahamman nirqa, ‘saqiy jallpʼaykita, ayllusniykita, tataykip wasintawan. Jinaspataq ripuy, ñuqa rikuchisqayki, chay jallpʼaman’, nispa. ¿Sumaq wasinta saqispa Diosta kasukunmanchu karqa? Kasukurqa, chayrayku Abrahamqa Diospa munasqa masinjina riqsichikurqa.

Abrahamqa yaqha tukuy ayllunwan Urmanta lluqsipurqa. Taré tatanwan, Lot sobrinonwan, chantapis Sara warminwan ima, Urmanta ripurqa. Chaymanta tukuyninku Harán jallpʼaman chayarqanku, chaypitaq Taré wañurqa. Urmanta karupiña kachkarqanku.

Chaymanta Abraham ayllunwan Canaán llaqtaman chayarqanku. Chaypitaq Jehová payta nirqa: ‘Kay jallpʼata mirayniykiman qusaq’, nispa. Abrahamqa Canaán llaqtapi qhipakuspa toldospi tiyakurqa.

Diosqa Abrahamta tʼinkayta qallarirqa. Ovejasnin mirarqanku, wak uywasninpis, kikillantaq kamachisninpis. Abrahamtaq Sara warminwan mana juk wawallankupis karqachu.

Abraham 99 watayuq kachkaptin Jehová payta nirqa: ‘Aswan qhipaman qam kanki achkha runaspa tatanku’, nispa. Chaywanpis, ¿imaynatá machu runasña kaspa wawayuq kankuman karqari?

Génesis 11:27-32; 12:1-7; 17:1-8, 15-17; 18:9-19.