LECCIÓN 8
Abrahanwan Sarawan Diosta kasukunku
Ur sutiyoj llajtaqa Babel llajtamanta mana ancha karupichu kasharqa. Ur llajtamanta runasqa mana Jehová Diostachu yupaychaj kanku. Jinapis chay llajtapeqa Abrahán sutiyoj runa Jehová Diosta yupaychaj.
Jehová Diosqa Abrahanman nerqa: “Saqey jallpʼaykita, parientesniykitawan, noqa rikuchisqayki chay jallpʼamantaj ripuy. Noqa mirayniykita uj jatun nacionman tukuchisaj. Qannejta tukuy jallpʼantinmanta runaspaj sumaj imasta ruwasaj”, nispa.
Abrahanqa mana yacharqachu maymanchus Jehová Dios kachashasqanta. Jinapis Jehová Diospi atienekorqa. Abrahanqa, warmin Sarawan, tatan Tarewan, sobrinon Lotwan ima Jehová Diosta kasukorqanku. Paykunaqa qʼepichakuytawan riporqanku.
Abrahanqa maymanchus Jehová Dios rinankuta munarqa chayman familianwan chayarqa. Chaypacha Abrahanqa 75 watasniyoj kasharqa, maymanchus chayarqanku chay jallpʼataj Canaán karqa. Chaypitaj Jehová Diosqa payman nerqa: “Tukuy kay jallpʼata mirayniykiman qosaj”, nispa. Jinapis Abrahanwan Sarawanqa viejitusña karqanku, nitaj wawasniyojchu karqanku. Qhepan capitulopi yachakusun imaynatachus Jehová Dios nisqanta juntʼasqanta.
“Abrahanpis creesqanrayku [...] kasukorqa, herenciapaj japʼinan karqa chay lugarmantaj rerqa. Payqa maymanchus rishasqanta mana yachaspapis, llajtanmanta llojsiporqa” (Hebreos 11:8).