50 yachachiy

Mana manchachikuq 2 warmis

ISRAELITAS llakiykunaman satʼikuytawan, Jehovamanta mañakurqanku. Paytaq mana manchachikuq runasta kachamurqa. Bibliapi paykunata jueces nispa sutichakun. Josué ñawpaq juez karqa. Wakkunataq Otniel, Aod, Samgar ima. Chantapis mana manchachikuq iskay warmis Israelta yanaparqanku, Débora, Jael sutichakurqanku.

Débora profetisa karqa. Imachus jamunanmanta Jehová payman willarqa, Deborataq Jehová nisqanmanjina willarqa. Deboraqa juez ima karqa. Payqa juk palma sachʼap uranpi tiyaykuspa, llakisqa runata yanapaq.

Chaypachaqa, Canaanmanta reyqa Jabín karqa. Payqa maqanakunapaq 900 carrosniyuq. Chantapis Jabinpa soldadosninqa may atiyniyuq kanku, chayrayku wakin israelitaspis paypa kamachisnin kanku. Jabinpa soldadosninta Sísara kamachiq.

Juk pʼunchay Deboraqa juez Baracta waqyaspa nirqa: ‘Kayta Jehová nin: “Tabor urquman riy 10.000 runasta uqharikuspa. Chayman Sisarata pusamusaq. Ñuqataq payta soldadosnintawan atipanaykipaq makiykipi churasaq”, nispa’.

Barac Deborata nirqa: ‘Qam ñuqawan riptiykiqa, risaq’. Deborataq paywan rin. Chaywanpis Baracman nirqa: ‘Kay kutipiqa may uyarisqa kayqa mana qampaqchu kanqa, imaraykuchus Jehovaqa juk warmip makinpi Sisarata jaywaykunqa’, nispa. Jinataq karqa.

Barac Tabor urqumanta Sisarap soldadosninwan tinkunanpaq uraykamurqa. Chayllapi Jehová tukuyta yakuwan pʼampaykuspa wañuchirqa. Sisarataq carronmanta uraqaspa ayqirqa.

Chaymanta Sisaraqa Jaelpa toldonman chayarqa. Jaeltaq waqyarikuspa lecheta jaywarqa. Chaywan Sisaraqa sinchita puñuykakapun. Chanta Jael toldonmanta estacata umanpi chinkaykuchin. ¡Jaelqa Barac chayamusqantawan, Sisarata wañusqata rikuchin! Jinamanta Deborap nisqanqa juntʼakurqa.

Chaymanta rey Jabinta wañuchinku; jinamanta israelitakunaqa juk tiempota waliqta kawsakunku.

Jueces 2:14-22; 4:1-24; 5:1-31.