Uj juez, iskay warmispiwan

Josueqa ashkha watasta israelitasta yanapaytawan, 110 watasniyoj wañuporqa. Pay kausashajtenqa israelitas Jehová Diosllata yupaycharqanku, wañupusqantawantaj, cananeos jina waj diosesta yupaycharqanku. Mana kasukusqankuraykutaj, Jehová Diosqa saqerqa Canaanmanta rey Jabín paykunata sufrichinanta. Chayraykutaj Diosman qhaparikorqanku. Diostaj Baracta juez kananpaj churarqa. Payqa israelitasta yanapanan karqa watejmanta Diosta yupaychanankupaj.

Profetisa Deboraqa Baracta wajyachispa nerqa: “Cisón wayqʼoman 10.000 runaswan riy, Jabinpa soldadosninwan maqanakamoj. Chaypitaj chay soldadosta kamachej Sisarata atipanki”, nispa. Baractaj Deborata nerqa: “Qan noqawan rejtiykeqa, risaj”, nispa. Paytaj nerqa: “Qanwan risaj. Jinapis mana qanchu Sisarata wañuchinki. Jehová Diosqa nin uj warmi payta wañuchinanta”, nispa.

Baracwan soldadosninwanqa, Deborawan khuska Tabor orqoman rispa maqanakupaj wakichikorqanku. Sisarataj chayta yachaytawan, carretasninta, soldadosnintawan Cisón mayupi tantaykorqa. Deboraqa Baracman nerqa: “Jehová Diosqa kunan yanapasonqa atipanaykipaj”, nispa. Chantá Baracqa 10.000 soldadosninwan orqomanta uraykamuspa, Sisaraj soldadosninwan maqanakorqa.

Jehová Diosqa Cisón mayumanta yakuta wasaykucherqa. Sisaraj carretasnintaj tʼuruman satʼiykukorqanku. Baracwan soldadosninwanqa, Sisaraj soldadosninta atipaykorqanku. Sisarataj carretanmanta uraykuytawan ayqerikaporqa, Jaelpa toldonpitaj pakaykukorqa. Jaeltaj lecheta jaywarqa, qhataykorqataj. Sisaraqa may saykʼusqa kasqanrayku puñurparerqa. Chantá Jaelqa chʼinllamanta chimpaykuspa toldomanta uj estacawan umanpi clavaykuspa wañucherqa.

Barac Sisarata maskʼaspa chayamojtin, Jaelqa toldonmanta llojsimuytawan nerqa: “Jamuy. Maskʼashanki chay runata rikuchisqayki”, nispa. Baractaj yaykuspa, Sisarata wañusqata rikorqa. Chantá Baracwan Deborawanqa Jehová Diosman takerqanku. Paymin paykunata yanaparqa enemigosninkuta atipanankupaj. Chantá israelitasqa 40 watasta allinta kausakorqanku.