5 rakʼiy
Akllayta atisqanchikqa, Diospa qusqan
1, 2. ¿Imata ruwayta atinanchikpaqtaq, Dios ruwawarqanchik?
DIOS, imaraykuchus ñakʼariy kananta saqisqanta, imatachus chinkachinanpaq ruwananta ima, yachanapaqqa, ñawpaqta imayna ruwasqachus kasqanchikta yachananchik tiyan. Payqa, mana cuerpoyuqllatachu, nitaq ñuqtuyuqllatachu, ruwawarqanchik; manaqa, yuyayniyuqta, munariyniyuqta ima.
2 Jinata ruwawasqanchikrayku, imatachus munasqanchikta akllayta atinchik. Arí, Dios akllayta atisqanchikta quwasqanchikqa, chiqamanta nisunman may sumaq kasqanta.
¿Imaynatá Dios ruwawarqanchik?
3-5. ¿Imaraykutaq akllayta atisqanchikwan kusisqa kanchik?
3 Kunanqa, imaraykuchus Dios ñakʼariy kananta saqisqanta yachanapaq, imaynatachus akllayta atisqanchik yanapawasqanchikta rikusun. Qallarinapaqqa, kaypi tʼukuriy: Qamqa, imatachus ruwanaykita, parlanaykita, mikhunaykita ima, chantapis, imaynatachus pʼachallikunaykita, imapichus llamkʼanaykita, maypichus tiyakunaykita ima, akllanki, chayraykutaq kusisqa kanki, ¿icharí? Chayri, ¿munawaqchu pillapis tukuy tiempo kamachisunanta, imatachus parlanaykita, imatachus ruwanaykita ima?
4 Chiqamantachá, ni mayqin runapis chayta munanmanchu. ¿Imarayku? Dios, akllayta atinapaq ruwawasqanchikrayku. Bibliaqa, Dios ‘payman rikchʼakuqta’ ruwawasqanchikta niwanchik, Paypis imatachus ruwayta munasqanta akllayta atin (Génesis 1:26; Deuteronomio 7:6). Chayrayku, runata, imatachus ruwayta munasqankuta akllayta atinankupaqjina ruwarqa. Chantachá, saqra kamachiqkuna watasqatajina japʼiwaptinchik, mayta llakikunchik.
5 Chayrayku, kacharichisqa kayta munasqanchikqa, mana qhasillamantachu rikhurin, manaqa Jehová kacharichiq Dios kasqanrayku. Biblia nin: “Maypichus Señorpa Espiritun kashan, chaypi manaña kanchu ima jarkʼajpis”, nispa (2 Corintios 3:17). Arí, Diosqa, munasqanchikta akllayta atinapaq ruwawarqanchik. Imaraykuchus, Ruwawaqninchikqa, imaynachus yuyayninchik, imaynachus sunqunchikpi munay kananta ima, sumaqta riqsirqa, chayrayku, akllayta atisqanchikwan aswan kusisqa kananchikta yacharqa.
6. Ñuqtunchik akllayta atinanpaq, ¿imaynatá Dios ruwarqa?
6 Chaywanpis, Diosqa, tʼukurinanchikpaq, chaymanjina ruwanapaq, imachus allin imataqchus mana allin kasqanta yachanapaq ima, ruwawarqanchik (Hebreos 5:14). Chayrayku, akllayta atisqanchikta, allin yuyaywan apaykachananchik tiyan. Mana camionjinachu ruwasqa kanchik, imaraykuchus camiontaqa, runa munasqanmanjina apaykachan. Nitaq uywasjinachu ruwasqa kanchik. Imaraykuchus, ñuqtunchikqa, akllayta atinanpaqjina ruwasqa kachkan.
Kawsayqa, sumaqta qallarirqa
7, 8. ¿Imaynatataq Dios, runap kawsayninta qallarichirqa?
7 Dios, ñawpa tatasninchikman munakusqanta rikuchinanpaqqa, tukuy imata paykunaman qurqa. Qallarinapaqqa, juk sumaq jatun huertaman paykunata churarqa. Tukuy imayuq karqanku. Yuyayninku, cuerponkupis, mana juchayuq kasqanrayku, mana machuyanankuchu nitaq wañunankuchu karqa, wiñay wiñaypaqtaq kawsankuman karqa. Wawasninkupis, mana juchayuq paqarikunkuman karqa, wiñaypaqtaq kusisqa kawsayta atinkuman karqa. Runa mirasqanmanjinataq, sumaq llamkʼayniyuq kankuman karqa, tukuy Jallpʼatataq, kʼacha huertaman tukuchinkuman karqa (Génesis 1:26-30; 2:15).
8 Tukuy imata paykunaman qusqanmanta, Biblia nin: “Dios rikorqa tukuy ima ruwasqanqa sumajpuni kasqanta” (Génesis 1:31). Chantapis, nillantaq: “Ruwasqasnenqa may sumajpuni”, nispa (Deuteronomio 32:4). Arí, Ruwawaqninchikqa, runap kawsayninta sumaqta qallarichirqa. ¡May munakuyniyuq Diospuni!
Mana saqrata ruwanapaqchu kacharichisqa kanchik
9, 10. ¿Imaraykutaq akllayta atisqanchikta, kamachiykunamanjina apaykachananchik tiyan?
9 Chaywanpis, ¿munarqachu Dios, akllayta atisqanchikta saqrapaq apaykachananchikta? Juk jatun llaqtapi tʼukuriy, maypichus tukuypis autonta munayninmanjina apaykachanku, maynintachus riyta munanku chayninta rinku. ¿Allinchu kanman? Mana, ¿icharí? Autos purinankupaq kamachiykuna mana kaptin, ichá autopura tinkurpankuman chayri runasta wañuchinkuman.
10 Kikillantaq akllayta atisqanchikwan kanman. Tukuypis munaynillanta ruwaptinqa, mana allinchu kanman. Arí, runap allinninpaqqa, kamachiykuna kananpuni tiyan. Diospa Palabran niwanchik: “Kacharichisqa runas kaspapis, ama kacharisqa kasqaykichejrayku sajrata ruwaychejchu”, nispa (1 Pedro 2:16). Diosqa, akllayta atisqanchikta, tukuypaq allinninpaqjina apaykachananchikta munan. Chantapis, payqa, kacharichisqa kayninchikta mana saqrata ruwanapaqchu apaykachananchikta munarqa, manaqa, kamachiykunamanjina kawsananchikta munarqa.
¿Piqpa kamachiykunasnintataq kasukusun?
11. ¿Piqpa kamachiykunasnintataq kasukunanchik tiyan?
11 Imayna ruwasqachus kasqanchikmanta, ¿piqpa kamachiykunasnintataq kasukunanchik tiyan? Kay 1 Pedro 2:16 nin: “Diospa kamachisnin jina kawsaychej”, nispa. Diospa kamachiykunasninmanjina kawsaytaq, mana watasqatajinachu japʼiwanchik, manaqa kusisqa kawsananchikpaq yanapawanchik (Mateo 22:35-40). Kamachiykunasninqa, mana runap kamachiykunasninjinachu, manaqa chiqan ñanta rikuchiwanchik. Jehová nin: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isaías 48:17).
12. ¿Imastataq Diospa kamachiykunasninta mana pʼakispa akllayta atinchik?
12 Chantapis, Diospa kamachiykunasninqa, mana wataykusqajina kawsanapaqchu. Imaraykuchus, runasqa tukuy imata akllayta atinchik. Sutʼinchanapaq, Jallpʼantinpiqa, tukuy imaymana mikhuna, pʼachas, takiykuna, wasis ima, tiyan. Chiqamantachá, chay imaspiqa, mana wak ñuqanchikrayku akllananta munasunmanchu.
13. ¿Ima kamachiykunatataq kawsananchikpaq kasukunanchik tiyan?
13 Rikunchikjina, Diospa kamachiykunasninmanjina kawsaspalla kusisqa kawsayta atinchik. Kayta sutʼinchanapaq, kay kamachiykunapi tʼukurina. Samanapaq ruwasqa kasqanchikrayku, yaku ukhupi unayta kaspaqa, wañurparisunman, imaraykuchus yaku ukhupiqa, mana samay kanchu. Jinallataq, mana yakuta ukyaptinchik, mana mikhuptinchik imaqa, wañupullasunmantaq, imaraykuchus kaykunaqa, kawsanapaq juk kamachiyjina kanku.
14. ¿Imaraykutaq Diospa kamachiyninpi kananchikpaq ruwasqa kasqanchikta nisunman?
14 Imaynatachus Dios samanapaq, mikhunapaq, ukyanapaq ima, ruwawarqanchik, kikillantataq kamachiykunasninta kawsananchikpaq quwarqanchik (Mateo 4:4). Runaqa, Ruwaqninpa kamachiyninta kasukuspalla kusisqa kawsanankupaq ruwasqa karqanku. Profeta Jeremías nin: “Yachani runaqa kausayninmanta mana dueñochu kasqanta, nitaj kausaynimpi maymanchus rinantapis kamachiyta atisqanta. Jasutʼiwayku, yachachiwayku, cheqan kasqaykiman jina”, nispa (Jeremías 10:23, 24, Qheshwa Biblia). Kayqa, runas Diospa kamachiykunasninta kasukuspa kawsanankupaq ruwasqa kasqankuta rikuchiwanchik, manataq runap kamachiykunasninmanjinachu.
15. Diospa kamachiykunasninta, ¿Adanwan, Evawan, juntʼayta atillankumanchu karqa?
15 Ñawpa tatasninchikpaqqa, Diospa kamachiykunasninta kasukuyqa atinankupaqjinalla kanman karqa. Astawanpis, kasukuptinkuqa allinninkupaq, tukuy runaspa allinninpaq ima, kanman karqa. Paykuna Diospa kamachiyninta kasukuptinkuqa, tukuyninchik kusisqa kawsachkasunman karqa. Arí, ¡juk sumaq paraisopi jatun familiajina jukchasqa kawsachkasunman karqa! Manataq, wañuy, saqra ruwaykuna, ñakʼariykuna ima, kanmanchu karqa.
[11 paginapi dibujo/foto]
Ruwawaqninchikqa, runap kawsayninta sumaqta qallarichirqa
[12 paginapi dibujo/foto]
¿Imayná kanman tukuypis, autospaq kamachiykunata mana kasukuspa, autonkuta apaykachaptinku?