6 rakʼiy
¿Imaraykutaq Dios, ñakʼariy kananta saqirqa?
1, 2. ¿Imaynamantá, ñawpa tatasninchik sumaq kawsayta chinkachirqanku?
DIOSQA, ñawpa tatasninchikpa kawsayninta, juk sumaq huertapi qallarichirqa, ¿imaynapí chay kawsay chinkapurqa? ¿Imaraykutaq, allin kawsay kananmanta nisqaqa, may chhika watasña saqra ruwaykuna, ñakʼariykuna ima, kachkan?
2 Adanwan, Evawan, akllayta atisqankuta mana allin kaqpaq apaykachasqankurayku. Paykunaqa, Diospa kamachiykunasninta kasukuspalla kusisqa kawsanankupaq ruwasqa kasqankupi, mana tʼukurillarqankupischu. Diospa contranpi uqharikuyta akllarqanku, paykunallamanta kusisqa kawsanankuta yuyaspa. Chayta ruwaspataq, akllayta atisqankuta mana allinpaqchu apaykacharqanku (Génesis, 3 tʼaqa).
Jatun tapuy rikhurirqa
3-5. ¿Imaraykutaq Dios, Adanta, Evata ima, wañurparichispa, watiqmanta wak runasta mana ruwarqachu?
3 ¿Imaraykutaq Dios, Adanta, Evata ima, wañurparichispa, watiqmanta wak runasta mana ruwarqachu? Imaraykuchus, Diospa contranta uqharikuspaqa, Paypa chiqan kamachiyninwan churanakurqanku.
4 Chayrayku, kay tapuy rikhurirqa: ¿Pitaq maychus kaqta kamachiyta atinman karqa? Dioslla, imaraykuchus, Payqa, tukuy atiyniyuqtaq, tukuy imata ruwaqtaq. Chantapis, tukuy yachayniyuq kasqanrayku, ni piqpa kamachiyninpis, aswan allin kayta atinmanchu. Chaywanpis, paykunaqa, Diospa chiqan kamachiyninwan churanakurqanku. Chantapis, ¿pantarqachu Diosninchik runata ruwaspa? Aswan qhipaman, kay tapuyman kutichikusqan, runap juntʼa sunqu kayninta sutʼinchasqanta rikusunchik.
5 Chantapis, runa, Diospa kamachiyninta qhisachaspaqa, kay tapuyta rikhurichillarqataq: Runas, Diospa mana kamachiynillanwan, ¿allintachu paykunapura kamachinakuyta atinkuman karqa? Dios, kay tapuypa kutichiyninta sumaqta yacharqa. Chaywanpis, chay kutichiyta paykunamantapuni yachanankupaq, akllasqankumanjina kamachinakunankuta saqirqa.
6, 7. ¿Imaraykutaq Dios may chhika watasta, runas munasqankuta akllanankuta saqin?
6 Dios, runasman atisqankumanjina kamachinakunankupaq, tiempota quspaqa, kay jatun tapuyta wiñaypaq sutʼincharqa: ¿Piqpa kamachiynintaq aswan allin kanman karqa? ¿Diospa kamachiyninchu?, chayri, ¿runaspa kamachiyninchu? Tiempota qusqantaq, runas politicapi, tukuy imata ruwasqankupi, yachayninkupi ima, tukuy yachayninkuta wiñachinankupaqjina kanan karqa.
7 Chayrayku, Dios, kunan tiempokama runasman tiempota qun, sutʼita rikukunanpaq, runas sapallankumanta, mana sumaqta kamachinakuyta atisqankuta. Ajinamanta runaqa, kunankama akllayta atin: kʼacha kayta chayri saqra kayta; munanakuyta chayri chiqninakuyta; chiqan kaqta ruwayta chayri mana chiqan kaqta ruwayta ima. Chaywanpis, akllasqankumanjina rikullankutaq, allin kawsayta chayri ñakʼariy kawsayta.
Janaqpachapi Diospa contranta uqharikurqanku
8, 9. a) ¿Imaynamantá janaqpachapi uqharikuy qallarirqa? b) ¿Pikunatawantaq Satanás, Diospa contranta uqharikunankupaq tanqarqa?
8 Chantapis, kaypi tʼukurinallanchiktaq tiyan. Mana ñawpa tatasnillanchikchu, Diospa kamachiyninman uqharikurqanku. ¿Pikunataq chay tiempopi kawsachkallarqankutaq? Ángeles. Dios, niraq runasta ruwachkaspaqa, janaqpachapi may chhika angelesta ruwarqa. Paykunatapis, akllayta atinankupaqjina, Diospa kamachiyninta kasukunankupaqjina ima, ruwarqa (Job 38:7; Apocalipsis 5:11).
9 Biblia rikuchisqanmanjina, Diosman uqharikuyqa, janaqpachapi qallarirqa. Juk ángel, munayninllanta ruwayta munarqa. Chantapis, payqa, runas yupaychanankuta munarqa (Mateo 4:8, 9). Kay angeltaq, Diospa kamachiynin mana allinchu kasqanta nispa, Adanta, Evata ima, Diospa contranta uqharikunankupaq tanqarqa (Génesis 3:1-5). Chayrayku, payta sutichakun: Kuraq Supay (Wakkunamanta llullata parlaq), Satanás (Churanakuq) ima. Tiemponmantaq, wak angelestawan Diospa contranta uqharikunankupaq tanqarqa. Paykunatataq, supaykuna sutiwan riqsikun (Deuteronomio 32:17; Apocalipsis 12:9; 16:14.)
10. Runaspa, angelespa ima, uqharikuyninku, ¿imapí tukun?
10 Runas, Diospa contranta uqharikuspaqa, Satanaspa, supaykunap ima, munayninta ruwarqanku. Chayrayku, Bibliaqa, “kay pachaj diosninqa” Satanás kasqanta nin, paytaq “mana creejkunaj yuyayninkuta laqhayachin”. Chantapis, Diospa Palabranqa, “kay pachapi kaj chhika runastaj Kuraj Supaypa atiynimpi kasqankuta” nillantaq. Jesuspis, Satanasta “kay pachata kamachej”, nispa suticharqa (2 Corintios 4:4; 1 Juan 5:19; Juan 12:31).
Iskay tapuykuna rikhurin
11. ¿Ima tapuytataq Satanás rikhurichillarqataq?
11 Satanasqa, Diospa contranta uqharikuchkaspa wak tapuyta rikhurichillarqataq. Payqa, Dios runasta ruwaspa pantasqanta nirqa, chantapis ni mayqin runa Diosman juntʼa sunqu kayta atisqanta nillarqataq. Mana chayllachu, runas ñakʼariypi kachkaspaqa, Diospa contranta saqrata rimanankuta nirqa (Job 2:1-5). Ajinamanta, Satanasqa, runaspa Diosman juntʼa sunqu kayninkuta iskaychachirqa.
12-14. Satanás iskay tapuykunata rikhurichisqanman, ¿imaynatá tiempo sutʼinchanman karqa?
12 Chayrayku, Dios tiempo pasananta saqirqa, kay iskay tapuykunaman kutichiy sutʼinchakunanpaq (Éxodo 9:16, kikinchay). Tiempo pasasqanmanjinataq, kay iskay tapuykuna sutʼinchakunan karqa.
13 Astawanpis, tiempo pasasqanmanjina, ¿imataq Diospa kamachiyninmanta yachakunan karqa? Runas sapallankumanta, ¿kamachinakuyta atinkumanchu karqa? Runap kamachiynillan, ¿atinmanchu karqa maqanakuykunata, saqra ruwaykunata ima, chinkachiyta chayri kusiy kawsayta apamuyta? Wakchayayta, unquykunata, machuyayta, wañuyta ima, ¿chinkachiyta atinmanchu karqa? Diospa kamachiynillan, chaykunataqa chinkachiyta atin (Génesis 1:26-31).
14 Iskay kaq tapuypi tʼukurispa, ¿chiqamantachu runa ñakʼariypi kaspa Diosta wasanchanman karqa? ¿Imatá tiempo rikuchinman karqarí? ¿Pantarqachu Dios runasta akllayta atinankupaqjina ruwaspa? ¿Mayqillanpis ñakʼariypi kachkaspa chiqan kaqta ruwanmanchu karqa? ¿Diospa kamachiyninta akllaqkuna kankumanchu karqa?
[13 paginapi dibujo/foto]
Diosqa, tiempo pasananta saqin, runa, yachayninta tukuy ima ruwasqanpi ñawparichinanpaqjina
[Maymantachus foto urqhukusqan]
Transbordador dibujoqa, NASA fotota urqhusqanmanjina