5 Yachaqana
¿Imatataq Dios Jallpʼapaq munan?
¿Imapaqtaq Jehová Jallpʼata ruwarqa? (1, 2)
¿Imaraykutaq Jallpʼa mana juk tʼikapachachu? (3)
¿Imapitaq saqra runakuna tukunqanku? (4)
¿Imatataq Jesús qhipaman ruwanqa, unquqkunapaq?, ¿machuyaqkunapaq?, ¿wañuqkunapaq? (5, 6)
¿Imatataq tʼinkakunata japʼinapaq ruwanayki tiyan? (7)
1. Jehovaqa runa wiñay wiñaypaq tiyakunanpaq Jallpʼata ruwarqa. Diosqa, kusisqa runamanta, chiqan runamanta juntʼakunanta munarqa (Salmo 115:16; Isaías 45:18). Jallpʼaqa mana jaykʼaq chinkanqachu; wiñay wiñaypaq kakunqa (Salmo 104:5; Eclesiastés 1:4).
2. Diosqa manaraq runata ruwachkaspa, Jallpʼapi juk kʼuchituta aqllarqa, chaypitaq juk kʼacha huertata ruwarqa, Edén sutiyuqta. Chaypitaq ñawpa qhariwarmita Adanta, Evatawan churarqa. Diosqa Jallpʼata juntʼanankukama miranankuta munarqa. Pisimanta pisitaq Jallpʼata tʼikapachaman tikrachinankuta munarqa (Génesis 1:28; 2:8, 15).
3. Adán Evawan Dios kamachisqanta mana kasukuspa juchallikurqanku. Chayrayku Jehovaqa, paykunata Edén huertamanta qharqurqa, jinamanta tʼikapacha chinkarqa (Génesis 3:1-6, 23). Chaywanpis, Jehovaqa jallpʼapaq munayninta mana qunqanchu. Payqa Jallpʼata tʼikapachaman tikrachinqa, chaypiytaq runa wiñay wiñaypaq kawsanqa. ¿Imaynatá chayta ruwanqa? (Salmo 37:29.)
4. Jallpʼa tʼikapachaman tikrakunanpaqqa, saqra runaraq chinkanan tiyan (Salmo 37:38). Chayqa Armagedonpi ruwakunqa, Armagedonqa, Diospa jatun maqanakuynin saqra kaqta chinkachinanpaq. Chaymanta, Satanás waranqa watata wisqʼasqa kanqa, manaña pipis Jallpʼata chʼichichanqachu. Diospa llaqtallan Jallpʼapi qhipakunqa (Apocalipsis 16:14, 16; 20:1-3).
5. Chaymanta Jesucristo waranqa watata Jallpʼata kamachinqa (Apocalipsis 20:6). Pisimanta pisi, juchaqa yuyayninchikmanta, ukhunchikmanta ima chinkanqa. Jinamanta mana juchayuq runaman tukusunchik, qallariypi Adán Evawan karqankujina. Manaña unquy, machuyay, wañuypis kanqachu. Unqusqakuna thañikunqanku, machu runataq waynayanqa (Job 33:25; Isaías 33:24; Apocalipsis 21:3, 4).
6. Jesuspa Waranqa Wata Kamachiyninpi, chiqa sunqu runakuna Jallpʼata tʼikapachaman tikrachinqanku (Salmo 37:29). Chantapis, may chhika wañusqakuna Jallpʼapi tiyakunankupaq kawsarimunqanku (Hechos 24:15). Diospa munayninta ruwaqkunaqa, wiñay wiñaypaq Jallpʼapi kawsanqanku, Mana ruwaqkunataq wiñaypaq wañunqanku (Juan 5:28, 29; Apocalipsis 20:11-15).
7. Jinamanta qallariymantapacha Jallpʼapaq Diospa munaynin juntʼakunqa. ¿Chay tʼinkakunata japʼikuyta munawaqchu? Jina kaptinqa, Jehovamanta yachakullaypuni, kamachisqantataq kasukullaypuni. Chayta ruwanapaqqa, Jehovamanta Sutʼinchaqkunap Tantakuy Wasinman riyta atinki (Isaías 11:9; Hebreos 10:24, 25).
[10 paginapi dibujo/foto]
Tʼikapacha chinkarqa
[11 paginapi dibujos/fotos]
Armagedonmanta qhipaman, Jallpʼaqa tʼikapachaman tikrakunqa