Bibliap yachachiykunasnin
¿Imatataq Diosninchik Jallpʼapaq munan?
Kay yachaqanaqa tapuykunasniykiman Bibliaykipi kutichiykunasta tarinaykipaq yanapasunqa. Munaptiykiqa Jehovamanta sutʼinchaqkunawan kay yachaqanata ukhunchayta atiwaq.
1. ¿Imatataq Dios Jallpʼapaq munan?
Dios angelesta janaqpachapi kawsanankupaq ruwaytawan, runata kay Jallpʼapi kawsananpaq ruwallarqataq (Job 38:4, 6, 7). Jehová ñawpa kaq runata juk kʼacha huerta Edén sutiyuqpi churarqa, payta, jamuq miraynintapis, wiñaypaq kawsayta atinankupaq ruwarqa (Génesis 2:15-17; Salmo 115:16 ñawiriy).
Jallpʼapi Edén huertaqa juk chiqallanpi karqa. Adanwan Evawan wawasniyuq kaspa, mirasqankumanjina Jallpʼantinta juk kʼacha huertaman tukuchinkuman karqa (Génesis 1:28). Bibliaqa Jallpʼa ni jaykʼaq chinkananta willan. (Salmo 104:5 ñawiriy.)
2. ¿Imaraykutaq kunan Jallpʼa mana juk kʼacha huertachu?
Adán, Eva ima Diosta mana kasukuspa, Edenmanta qharquchikurqanku. Chayrayku kʼacha huerta chinkarqa, nitaq pipis watiqmanta sayarichiyta atinchu. Chayraykuchá Biblia niwanchik: “Kay pachataqa juchasapaspa makinkuman churan”, nispa (Job 9:24; Génesis 3:23, 24 ñawiriy).
Jehovaqa munayninta mana qunqapunchu, nitaq imatachus nisqanta jinallata saqirparinchu (Isaías 45:18). Diosqa watiqmanta runata imaynachus qallariypi karqa ajinaman kutichipunqa. (Salmo 37:11 ñawiriy.)
3. ¿Imatataq Dios Jallpʼapi allin kawsay watiqmanta kananpaq ruwanqa?
Runas allinpi kawsakunankupaq Jehová saqra runasta chinkachinan tiyan. Chayqa jatun maqanakuy Armagedonpi ruwakunqa, maypachachus angelesnin paypa enemigosninta chinkachinqanku. Chantá Satanás waranqa watasta wisqʼasqa kanqa, Diosta munakuqkunataq musuq pachapi kusisqas kawsakunqanku. (Apocalipsis 16:14, 16; 20:1-3; 21:3, 4 ñawiriy.)
4. ¿Maykʼaqtaq ñakʼariy chinkanqa?
Jesús waranqa watasta Jallpʼata janaqpachamanta kamachichkaptin, tʼika pachaman tukuchinqa. Chantapis Diosta munakuqkunap juchasninkuta pampachanqa, jinamanta wañuyta, machuyayta, unquyta ima chinkachinqa. (Isaías 11:9; 25:8; 33:24; 35:1 ñawiriy.)
Chantá, ¿maykʼaqtaq Dios saqra kaqta chinkachinqa? Jesusqa juk ‘señalta’ qurqa chay pʼunchay qayllapiña kasqanta yachanapaq. Kay tiempopi saqra ruwaykunaqa, runaspa kawsayninta mana allinman tukuchichkan, chaytaq ‘kay pachap tukukuyninpi’ kawsachkasqanchikta rikuchiwanchik. (Mateo 24:3, 7-14, 21, 22; 2 Timoteo 3:1-5 ñawiriy.)
5. ¿Pikunataq tʼika pachapi kawsakunqanku?
Jesusqa discipulosninta kamachirqa wakkunata yachachisqasninman tukuchinankuta chantapis munakuq Diosjina kanankupaq yachachinankuta (Mateo 28:19, 20). Jehovaqa Jallpʼantinmanta may chhika runasta musuq pachapi kawsanankupaq wakichichkan (Sofonías 2:3). Jehovamanta sutʼinchaqkunap Tantakunapaq Wasinkuman riqkuna sumaq qusas, tatas ima kanankupaq yachakunku. Familiasqa imaraykuchus qhipaman aswan sumaq kawsay kananpi atienekuna kasqanta chaypi yachakunku. (Miqueas 4:1-4 ñawiriy.)
Tantakunapaq Wasipi Diosta munakuqkunata, paypa munayninta juntʼayta munaqkunata ima tarinki. (Hebreos 10:24, 25 ñawiriy.)
Astawan yachakuyta munaspaqa, kay ¿Imatapunitaq Biblia yachachin? librop 3 yachaqananta ñawiriy. Kaytaqa Jehovamanta sutʼinchaqkuna urqhunku.