Jallpʼantinpi willanankupaq, ¿imayna wakichisqataq kachkanku?
JEHOVAMANTA SUTʼINCHAQKUNA iskay pachak kimsa chunka kuraq suyuspi Diospa Palabranmanta willanankupaq, kayjinamanta wakichisqa kachkanku: Diospa Llaqtanta Kamachiqkunaqa, Brooklyn (Nueva York) llaqtapi kachkanku, paykunataq pachantinpi Diospa Palabranmanta willayta ñawpaqman tanqachkanku. Paykunaqa, Diospa llaqtanpa sucursalesninta waturinanpaq, sapa wata juk hermanota kachanku, paytaq chaypi umapi kaqkunawan tantakun. Sapa sucursalpi, kimsamanta qanchiskama hermanos kamachinankupaq churasqa kanku, paykunataq chay suyupi Diosmanta willayta ñawpaqman tanqachkanku. Wakin sucursalespiqa, publicacionesta ruwanankupaq, máquinas tiyan. Sapa sucursaltaq, chay suyuta distritos nisqaman tʼaqan, chay distritotaq, circuitos nisqapi tʼaqasqa kachkan, sapa circuitopitaq iskay chunka qutuchakuykunajina tiyan. Superintendente de Distrito nisqaqa, watapi sapa circuitota waturin. Sapa circuitotaq, watapi iskay jatun tantakuykunata ruwan. Circuitota waturiq hermano kallantaq. Payqa, circuitonmanta qutuchakuykunata watapi iskay kutita waturin, jinamanta sapa qutuchakuyta willaypi yanapananpaq.
Jehovamanta sutʼinchaqkunaqa, maypichus tiyakunki chaypi, qutuchakuyniqta, Tantakunapaq Wasinkuniqta ima, Diosmanta willayta ñawpaqman tanqanku. Sapa qutuchakuy maykamachus willamunan kasqanqa, sumaq tʼaqasqa kachkan, jinamanta chaypi tiyakuq runasman allin willaykunata willanankupaq. Sapa qutuchakuypi iskay pachakjina willaqkuna kankuman, wakinpitaq aswan pisilla, chay qutuchakuypitaq achkha ancianos tiyan, paykunataq tukuy laya llamkʼayta ruwanku. Jehovamanta sutʼinchaqkunaqa, ima ruwanamantapis, Diosmanta willayta aswan ñawpaqman churanku. Jehovamanta sutʼinchaqkuna, Diospa Llaqtanta kamachinapaq oficinaspi, sucursalespi, qutuchakuykunapi ima, llamkʼaspapis, Diospa Reinonmanta willayta mana saqinkuchu.
Jehovamanta sutʼinchaqkunaqa, Diospa llaqtanta kamachinapaq oficinasninkuman, Diospa Reinonmanta willamusqankumanta willanku, chaytaq Anuario nisqa wakichikunanpaq yanapan, jinamanta imaynatachus runasman sapa wata Jehovamanta, Reinonmanta ima, willay ruwakusqan yachakun. Kay wataspi Jesucristop wañuyninta yuyarinapaq tantakuyman, chunka qanchisniyuq junujina, Jehovamanta sutʼinchaqkuna, wak runaspiwan, tantakurqanku, waranqa junumanta aswan kuraq horastataq, runasman willamurqanku, sapa watataq yaqha kimsa pachak waranqajina bautizakunku. May chhika publicacionesta runasman saqinku.