14 Yachaqana
¿Imaynatá Jehovamanta sutʼinchaqkuna wakichisqa kanku?
¿Maykʼaqtaq kunan tiempopi Jehovamanta sutʼinchaqkuna rikhurinku? (1)
¿Imaynatá tantakuyninkuta ruwanku? (2)
¿Ima qullqiwantaq yanapakunku? (3)
¿Pikunataq qutuchakuykunapi yanapanku? (4)
¿Ima jatun tantakuykunataq sapa wata ruwakun? (5)
¿Ima llamkʼaytaq sucursal nisqapi ruwakun? (6)
1. Kunan tiempopi Jehovamanta sutʼinchaqkunaqa, 1870 watakunapi ruwayninkuta qallarirqanku. Qallarichkaspa ‘Bibliamanta Yachaqaqkuna’ nispa sutichakurqanku, 1931 watapitaq Biblia nisqanmanjina ‘Jehovamanta sutʼinchaqkuna’ nispa sutichakurqanku (Isaías 43:10, Qhechua Biblia). Diospa llaqtanqa pisimanta pisi achkhaman yapakun, kunanqa may chhika Sutʼinchaqkuna, 230 suyumanta astawan suyukunapi willachkanku.
2. Jehovamanta sutʼinchaqkunaqa, kimsa kutita semanapi tantakunku. Mayqin tantakuyllamanpis rinaykipaq waqyasqa kanki (Hebreos 10:24, 25). Chay tantakuykunapiqa Bibliamanta yachachikun. Diosmanta mañakuspa qallarikun, kikillantataq tukuchanku, yaqha tukuyninpitaq Diosta yupaychanapaq ‘takiykunata’ takikun (Efesios 5:18, 19). Chay tantakuykunaqa tukuy runapaq, manataq qullqita mañakunchu (Mateo 10:8).
3. Yaqha tukuy qutuchakuykuna, Tantakuy Wasipi ruwakun. Chay wasikunataqa Jehovamanta sutʼinchaqkuna ruwanku. Chaypiqa mana lantikuna, nitaq cruzkunapis kanchu. Munaqkunaqa, sunqunpi munasqankumanjina qullqita qunqu. Chaypaqqa cajakunata wakichikun (2 Corintios 9:7).
4. Sapa qutupi ancianokuna chayri kuraqkuna tiyan, paykuna qutuchakuypi yachachinku (1 Timoteo 3:1-7; 5:17). Paykunata siervos ministeriales nisqa yanapanku (1 Timoteo 3:8-10, 12, 13). Paykunaqa qutuchakuypi mana umankuta uqharinkuchu (2 Corintios 1:24). Mana uqharisqa sutiwanpis sutichachikunkuchu (Mateo 23:8-10). Mana jukjinata pʼachallikunkuchu. Mana yanapasqankumanta qullqita japʼinkuchu. Kuraqkunaqa, tukuy sunquwan qutuchakuqkunata Diosmanta yachachispa yanapanku. Llakikuqkunata sunquchanku, umachanku ima (Santiago 5:14-16; 1 Pedro 5:2, 3).
5. Sapa wata Jehovamanta sutʼinchaqkuna jatun tantakuykunata ruwanku. Chaymanqa achkha qutukuna rispa Bibliamanta astawan yachakunku. Chay jatun tantakuykunapiqa, musuq kaqkunapis bautizakuyta atinku (Mateo 3:13-17; Hechos 2:38).
6. Jehovamanta sutʼinchaqkunap mama wasin Nueva York nisqa llaqtapi kachkan. Chaypi Cuerpo Gobernante nisqa kachkan. Paykunaqa Bibliamanta allin yachayniyuq kanku, tukuy jallpʼapi qutukunata qhawarinku. Chantapis jallpʼantinpi, pachaqmanta astawan sucursales nisqa tiyan. Chaypi llamkʼaqkuna, qillqakunata ruwakunanpaq, tukuyniqman apachinankupaq ima, allin sunquwan yanapanku. Chantapis, chaymantapacha tukuy runaman willananchikpaq kamachimunku. Llaqtaykipi sucursal nisqaman, ¿riyta munawaqchu?