¿Imaraykú Diospa llajtan sumaj wakichisqa kanan tiyan?

1. ¿Imaraykutaj Diosninchej uj llajtata ajllakorqa?

Diosqa kamachin Abrahanpa mirayninta, llajtan kananpaj ajllarqa, leyestataj qorqa. Chay llajtataqa Israel nispa suticharqa. Chay llajtamanta kajkunataj Diosta munayninman jina yupaycharqanku, nisqasnintataj kasukorqanku (Salmo 147:19, 20). Tukuy suyusqa, paykunanejta bendecisqa kananku karqa. Génesis 22:18 leey.

Diosqa israelitasta testigosnin kanankupaj ajllarqa. Paykunaj kausayninkupitaj rikukorqa, Diospa leyesninta kasukuy may allin kasqanta (Deuteronomio 4:6). Waj runaspis, paykunanejta Jehová Diosta rejsiyta atinkuman karqa. Isaías 43:10, 12 leey.

2. ¿Imaraykutaj Diospa kamachisnin wakichisqa kananku tiyan?

Jehová Diosqa Israel llajtata qhesacharqa, waj llajtayoj runastataj kamachisnin kanankupaj ajllakorqa (Mateo 21:43; 23:37, 38). Chayrayku kay tiempopeqa manaña israelitaschu Jehovaj testigosnin kanku, manachayqa cheqan cristianos. Hechos 15:14, 17 leey.

Jesusqa yachachisqasninta tukuy runasman willanankupaj, yachachinankupaj ima wakicherqa (Mateo 10:7, 11; 24:14; 28:19, 20). Chay llankʼaytaj kay qhepa pʼunchaykunapi ni jaykʼaj jina ruwakushan. Arí, Jehová Diosqa tukuy nacionesmanta may chhika runasta, cheqan religionpi kanankupaj tantashan (Apocalipsis 7:9, 10). Cristianosqa ujchasqa kasqankurayku, purajmanta yanapakunku, kallpachanakunkutaj. Chantapis tukuyninku, tantakuyninkupi kikinta yachakunku. Hebreos 10:24, 25 leey.

3. ¿Imaynatá kay tiempopi Jehovaj testigosnin rikhurerqanku?

Paykunaqa 1870 wata chaynejpi rikhurerqanku. Chaypachaqa uj juchʼuy qotu runas Bibliaj nisqanta estudiaspa sutʼita entienderqanku. Paykunaqa yacharqanku Jesús yachachisqasninta runasman willamunankupaj wakichisqanta. Chayrayku Diospa Gobiernonmanta mundontinpi willayta qallarerqanku. Kay 1931 watapitaj “Jehovaj testigosnin” nispa sutichakorqanku. Hechos 1:8; 2:1, 4; 5:42 leey.

4. ¿Imayna wakichisqataj Jehovaj testigosnin kashanku?

Ñaupa tiempopi cristianostaqa, wakin “apostoleswan ancianoswan” kamachej kanku. Paykunataj Jesusta congregacionpa Umankuta jina qhawaj kanku (Hechos 16:4, 5). Kunanpis Jehovaj testigosnintaqa Diospa Llajtanta Kamachejkuna ñaupajman apashanku. Paykunaqa unaytaña Diospaj llankʼaj cristianos kanku, sapa nacionmanta sucursalestataj qhawarinku. Chay sucursalespeqa Bibliata estudiachinapaj apaykachanchej chay publicacionesta 800 kuraj parlaykunaman tijrachinku. Chantá tukuynejman apachinku. Diospa Llajtanta Kamachejkunaqa, 120.000 kuraj congregacionesta Bibliaj nisqanwan kallpachanku, yuyaychanku ima. Sapa congregacionta qhawanankupajtaj, sumaj wakichisqa hermanos churasqa kanku. 1 Pedro 5:2, 3 leey.

Jehovaj testigosnenqa, sumaj willaykunata willanankupaj, runasta yachachinankupaj ima wakichisqa kashanku. Apóstoles jinataj wasimanta wasi willanku (Hechos 20:20). Diosmanta yachakuyta munajkunamanpis, Bibliamanta yachachinku. Mana chayllachu, uj familia jina kanku, uj kʼacha Tatayojllataj. Chayrayku hermanos jina purajmanta munanakunku (2 Tesalonicenses 1:3). Chantapis Diosta kusichinankupaj, runa masinkuta yanapanankupaj kallpachakusqankurayku, ¡may kusisqa familia kanku! Salmo 33:12; Hechos 20:35 leey.