Kasukoyqa allinninchejpaj

¿IMATACHÁ munasqaykita ruwayta munawajchu, chaymantataj ni pí ima nisunanta? Ama manchachikuychu, willarillaway...

¿Munasqaykita ruwajtiykichu allin risunki? Chayrí, ¿tataykita mamaykita kasukojtiykichu?... Diosqa tataykita, mamaykita kasukunaykita munan. Manataj qhasichu chayta kamachisunki. Qhawarina imaraykuchus kasukuna kasqanta.

¿Mashkha watayojtaj kanki?... ¿Yachankichu mashkha watayojchus tatayki kasqanta?... Mamayki, abuelitosniykirí, ¿mashkha watayojtaj kanku?... Paykunaqa qanmanta nisqa unaytaña kausanku. Runasqa aswan unayta kausaspa, astawan yachanku. Sapa wata waj imasta uyarinku, qhawanku chayri ruwanku. Chayrayku wawasqa, kuraj runasmanta mayta yachakunkuman.

¿Rejsinkichu pillatapis qanmanta aswan sullkʼata?... ¿Pitaj astawan yachan? ¿Qanchu, paychu?... ¿Imaraykú?... Qanqa unaytaña kausakusqaykirayku, ashkha imastaña yachakunki.

¿Pitaj tukuy runasmanta aswan unaytaña kausan?... Jehová Dios. Payqa tukuy runasmanta nisqa astawan yachan. Kamachisqanta mana juntʼayta atinapaj jina qhawajtinchejpis, chay kamachisqanqa allinninchejpajpuni. Nitaj chaymanta iskayrayanachu. Uj kuti, Sumaj Yachachej Jesuspis mana kasukuyta atillarqachu, ¿chayta yacharqankichu?...

Chay kutipi, Dios imatachus Jesusman kamachisqanqa, mana juntʼayta atina jinallachu karqa. Chayrayku dibujopi rikushanki jina, Jesusqa Diosmanta mañakorqa: “Munankichus chayqa, noqamanta karunchay, ñakʼarinay kashan, chayta”, nispa. Ajinata nispaqa, Diospa munayninta ruway wakin kutis mana atikullasqanta rikuchisharqa. Jesús mañakuyninta tukuchashaspa, ¿imatachus nisqanta yachankichu?...

Jesús nerqa: “Ama munaynillayqa kachunchu, manachayqa qampa munayniyki ruwasqa kachun”, nispa (Lucas 22:41, 42). Jesusqa Diospa munaynin ruwakunanta munarqa, manataj paypatachu. Chayrayku Diospa munayninta ruwarqa, manataj payman imachus allin rijchʼarqa chaytachu.

¿Imatá chaymanta yachakunchej?... Diostaqa kasukunapuni kasqanta, mana atikullajtinpis. Chantá, ¿imatawan yachakunchej?... Dioswan Jesuswan mana ujllachu kasqankuta. Ashkha runastaj ujlla kasqankuta ninku. Jehová Diosqa Wawan Jesusmanta kuraj, paymanta nisqataj astawan yachan.

Diosta kasukuspaqa, payta munakusqanchejta rikuchinchej. Biblia nin: “Diosta munakoyqa kamachisqasninta juntʼaymin”, nispa (1 Juan 5:3). Chayrayku Diostaqa tukuy kasukuna tiyan. Qanpis kasukuyta munanki, ¿icharí?...

Imatachus wawasman Dios kamachisqanta Bibliapi leerina. Efesios capítulo 6, versículos 1, 2, 3 nin: “Wawas, Señorpi kaspa, tataykichejta mamaykichejta kasuychej, imaraykuchus chayqa cheqanmin. Kamachisqa leypi nin: Tataykita, mamaykitawan jatumpaj qhaway, allin risunampaj, kay pachapi unayta kawsanaykipajtaj, nispa. Chaymin ñawpaj kaj promesayoj kamachisqaqa”.

Leerinchej jina, Jehová Diosqa munan tataykita mamaykita kasukunaykita. Chantá, ¿ima niyta munan paykunata “jatumpaj qhaway”? Niyta munan paykunata respetanayki kasqanta. Diosqa tataykita, mamaykita kasukojtiyki allin risunanta nin.

Ñaupa tiempopi, kasukusqankurayku salvakoj runasmanta willarisqayki. Paykunaqa Jerusalén llajtapi tiyakorqanku. Chay llajtapi tiyakoj runasqa casi tukuyninku, Diosta mana kasukojchu kanku. Chayrayku Jesusqa, chay llajtata Dios thuñinanta nerqa. Chantapis sutʼincharqa, cheqan kajta munakojkuna imaynatachus salvakunankuta. Jesús nerqa: ‘Jerusalén llajtata soldadoswan muyurisqata rikuspa, yachaychej thuñikunan chayamusqanta. Chaypacha Jerusalenmanta llojsispa orqosman ayqeychej’, nispa (Lucas 21:20-22).

Jesús nisqanman jinapunitaj karqa, Romamanta soldadosqa Jerusalenta muyuykorqanku thuñinankupaj. Tʼukunapaj jinataj, soldadosqa jinallamanta riporqanku. Casi tukuy runasqa manaña ima kananta yuyaspa, mana riporqankuchu. ¿Imata ruwanankutataj Jesús nerqa?... Jerusalenpi tiyakuwaj karqa chay, ¿imatá ruwawaj karqa?... Jesusta kasukojkunaqa, wasisninkuta saqespa, Jerusalenmanta karupi kaj orqosman ayqekorqanku.

Jinapis qhepan watanman, Jerusalenqa pachallanpuni kakusharqa. Kinsa watas pasajtinñapis, nipuni imapis karqachu. Wakin runasqa ichapis yuyarqanku, llajtamanta ripojkuna sonsos kasqankuta. Chaywanpis tawa watanman, romano soldadosqa watejmanta kutimorqanku, Jerusalentataj muyuykorqanku. Chay kutipeqa niña pipis ayqeyta aterqachu. Soldadostaj Jerusalenta thuñerqanku. Chay llajtapi kaj runasqa casi tukuy wañorqanku, puchojkunatataj presochaspa aparqanku.

Jinapis, ¿imataj karqa Jesusta kasukojkunamanta?... Jerusalenmanta karupi kasharqanku. Paykunaqa kasukusqankurayku salvakorqanku.

Kasukuyta yachay, ¿qantapis yanapasunkimanchu?... Ichapis tatayki chayri mamayki nisunki: “¡Ama callepi pujllawankichu!”, nispa. ¿Imajtintaj callepi pujllanaykita mana munankuchu?... Imaraykuchus autowan saruchikuwaj. Chaywanpis ichá yuyawaj: “Kunanqa mana auto kanchu, pujllakullasaj. Waj wawaspis callepi pujllallanku, nitaj imanakunkuchu”, nispa.

Jerusalenpi kaj runaspis jinallatataj yuyarqanku. Romano soldados ripojtinku, Jerusalenpi tukuy imapis allillan kaspa jinarqa. Runasqa wajkunata mana ripojta rikuspa, manallataj riporqankuchu. Paykunaqa Jesuspa nisqanta mana kasukusqankurayku wañorqanku.

Kunanqa kaypiñataj tʼukuriy. ¿Maykʼajllapis fosforowan pujllarqankichu?... Ichapis fosforota japʼichispa pujllariyta gustachikunki. Chaywanpis fosforowan pujllaspaqa wasita enqhaykuwaj, wañuwajtaj.

Yuyariy, mana wakin kutillachu kasukunayki tiyan. Tukuy imapi kasukuspalla mana ima llakiypi rikukunkichu. ¿Pitaj nin: ‘Wawas, tataykichejta mamaykichejta kasuychej’, nispa?... Chaytaqa Dios nin. Munakususqanraykutaj chayta nisunki.