¿Imaraykú perdonayta yachana tiyan?

¿MAYKʼAJLLAPIS maqasorqankuchu? Chayri, ¿sonqoykita nanachisorqankuchu?... ¿Chaymanta pagachikunaykichu kanman?...

Ashkha runas sajramanta sajrallatataj kutichinku. Jesustaj contranchejpi juchallikojta perdonananchej kasqanta yachacherqa (Mateo 6:12). Chay runa sapa kuti contranchejpi juchallejtinrí, ¿mashkha kutitataj perdonananchej tiyan?...

Apóstol Pedroqa chayta yachayta munaspa, Jesusta taporqa: ‘¿Qanchis kutitachu runa masiyta perdonanay tiyan?’, nispa. Jesustaj kuticherqa: ‘Qanchis chunka kuti qanchiskamaraj perdonanayki tiyan’, nispa. Arí, Pedroqa mana qanchis kutillatachu perdonanan karqa.

¡Chayqa ancha ashkha! Pillapis chay chhikata phiñachiwajtinchejqa, ¿manacharí yuyariyta atisunmanchu? ¿Imatá Jesús yachachisharqa? Runa masinchej sajra imasta ruwawasqanchejtaqa, mana yupanachu kasqanta. “Perdonaway” niwajtinchejqa, perdonana tiyan.

Jesusqa munarqa yachachisqasnin perdonayta yachanankuta. Chayrayku Pedroj tapuyninman kutichiytawan, uj rijchʼanachinata paykunaman willarqa. Chay rijchʼanachinata, ¿uyariyta munawajchu?...

Uj llajtapi, uj kʼacha rey kasqa. Kamachisninmanpis pisichikojtinkoqa qolqeta manuriyta yachaj. Uj pʼunchay, qolqenta kutichipunankupaj payman manu kajkunata wajyachisqa. Ujnin kamachenqa 60 millones qolqeta debesqa. Chayqa, ¡may chhika qolqe karqa!

Kamacheqa chay qolqeta qʼalata tukuchisqa, nitaj imaynapi manunta juntʼayta atisqachu. Chayrayku manunta juntʼananpaj, reyqa kamachisqa vendesqa kananta, chay kamachi, warmin, wawasnin, tukuy imasninpiwan. ¿Imatá chay kamachi ruwarqa?...

Chay kamacheqa reypa ñaupaqenman qonqoriykukuspa, maytapuni mañakusqa: “Reyníy, suyarillawayraj ari, chantá tukuyninta qopullasqayki”, nispa. Chay rey kawaj karqa chay, ¿imatá ruwawaj karqa?... Reyqa kamachinta khuyaspa, manunta perdonapusqa. Nisqataj chay 60 millonesmanta ni uj phatallatapis kutichipunanta. Kamacheqa, ¡maytachá kusikorqa!

Chantá, ¿yachankichu imatachus chay kamachi ruwasqanta? Chaymanta ripushaspa kamachi masinwan tinkukusqa. Kamachi masenqa 100 qolqeta debesqa. Payta qʼallpispataj, “qolqeyta qopuway”, nisqa. Reyqa chay chhika manuta perdonarqa, chay kamachitaj chay chhikitata mana perdonayta munasqachu. Chay ruwasqan, ¿allinchu karqa?...

Pachaj qolqeta debej kamacheqa wajcha karqa. Nitaj chay rato kutichipuyta aterqachu. Chayraykutaj kamachi masinpa ñaupaqenman qonqoriykukuspa, mañakusqa: “Suyarillaway ari, tukuyninta qopullasqayki”, nispa. Chay manurej kamachi, ¿kamachi masinta suyarinallanchu karqa?... ¿Imatá qan ruwawaj karqa?...

Chay manurej kamacheqa mana chay kʼacha rey jinachu kasqa. Payqa chay ratopacha qolqenta kutichipunanta munasqa. Kamachi masin mana kutichipuyta atejtintaj, carcelman wisqʼaykuchisqa. Waj kamachi masisnin chayta rikuspa rabiakusqanku. Carcelpi wisqʼasqa kamachimanta llakikuspataj, reyman willaykamusqanku.

Reypis chayta yachaspa rabiakullasqataj. Mana perdonaj kamachipajtaj mayta phiñakusqa. Chayrayku chay kamachita wajyachimuspa nisqa: ‘Sajra kamachi, noqaqa tukuy manuykita perdonarqayki. ¿Manachu qanpis kamachi masiykita khuyanayki karqa?’, nispa.

Chay sajra kamacheqa, ¿kʼacha rey jinacharí khuyanan karqa? Jinapis mana chaytachu ruwarqa. Chayrayku reyqa carcelman wisqʼaykuchisqa, 60 millones manunta juntʼanankama. Carcelpi kaspaqa manunta ni jaykʼaj juntʼayta atinmanchu karqa. Chayllapiña wañunman karqa.

Jesusqa chay rijchʼanachinata willaytawan, yachachisqasninman nerqa: ‘Kikillantataj qankunatapis cielopi kashaj Tatayqa ruwasonqachej, manachus hermanosniykichejta tukuy sonqo perdonankichej chayqa’, nispa (Mateo 18:21-35).

Tukuyninchej Diosman ashkha manu kanchej. Kausaytapis pay qowanchej. Noqanchejqa, 60 millones qolqeta debej kamachiman rijchʼakunchej. Contranchejpi juchallikojtaj 100 qolqeta debej kamachiman rijchʼakun. Nisunman Diospa contranta juchallisqanchejqa may ashkha, wajkuna contranchejpi juchallisqankumanta nisqaqa.

Diosqa may kʼachapuni. Sajra imasta ruwajtinchejpis payqa perdonawanchej. Nitaj wañuchispachu juchanchejmanta pagachiwanchej. Jinapis kayta yuyarina tiyan: Diosqa perdonawanchej wajkunata perdonajtillanchej. Chaytaqa mana qonqanachu kanman, ¿icharí?...

Pillapis contraykipi mana allin kajta ruwaytawan, “perdonaway” nisonqa chay, ¿imatá ruwanki? ¿Perdonankichu?... Kutin kutita mana allin kajta ruwasojtinrí, ¿perdonallankipunichu?...

Noqanchej perdonta mañakusunman chayqa, munasunman perdonasqa kayta, ¿icharí?... Chayrayku noqanchejpis perdonananchej tiyan, mana simillamantachu, manaqa sonqomantapacha. Ajinamanta Sumaj Yachachej Jesuspa yachachisqasninpuni kayta munasqanchejta rikuchisun.