Wajkunata perdonana tiyan

Jesusqa hermanosninchejwan ima problematapis allinchanamanta parlarqa. Pedrotaj chayta uyarispapis, ichá yachayta munarqa Jesús yuyaychasqanman jina mashkha kutitachus ruwanan kasqanta.

Chayrayku Jesusta taporqa: “Señor, hermanoy contraypi juchallikojtin, ¿mashkha kutitataj juchanta perdonasajri? ¿Qanchis kutitachu?”, nispa. Judiospa religionninkuta ñaupajman apajkunamanta wakenqa, kinsa kutillata perdonana kasqanta yachachej kanku. Chayrayku Pedroqa ‘qanchis kutita’ perdonaspa, ichapis may kʼacha kasqanta yuyarqa (Mateo 18:21).

Jesusrí payta nerqa: “Noqa niyki: Mana qanchis kutillatachu, manachayqa 77 kutista”, nispa (Mateo 18:22). Jesusqa chayta nispa, nisharqa perdonasqanchejta mana yupanata, sapa kutitaj perdonanata. Chayrayku Pedroqa hermanosta sapa kuti perdonanan karqa.

Jesusqa munarqa Pedrowan waj yachachisqasninwan wajkunata perdonayta yachakunankuta. Chayrayku Jesusqa, mana khuyakoj kamachimanta parlarqa. Uj reyqa kamachisninmanta cuentata mañasqa. Chantá chunka waranqa talentos manuyoj kamachinta wajyachisqa. Chay qolqeqa 60 millones denarios qolqewan ninakun. Chay kamachi mana manunta juntʼayta atejtintaj, reyqa kamachisqa vendenankuta chay runata, warminta, wawasnintawan. Chantá, kamacheqa reypa ñaupaqenman qonqoriykukuspa nisqa: “Suyarillaway ari, tukuyninta kutichipullasqayki”, nispa (Mateo 18:26).

Reynintaj mayta khuyakuspa kamachinta kacharipusqa, manuntapis perdonapusqa. Chay kamachitaj, llojsispa uj kamachi masinta taripamusqa, pichus 100 denario qolqe manun kasqa. Payta japʼiytawantaj qʼallpispa nisqa: “Manususqayta kutichipuway”, nispa. Kamachi masintaj qonqoriykukuspa mayta mañakusqa: “Suyarillaway ari, kutichipullasqayki”, nispa (Mateo 18:28, 29). Chay kamacheqa may chhika manunta rey perdonashajtinpis, mana perdonasqachu kamachi masinta. Astawanpis payqa carcelman wisqʼaykuchisqa, manunta juntʼanankama.

Kamachi masisnintaj chayta rikuspa llakikusqanku. Reyninkumantaj chay tukuy imasta willamusqanku. Chantá reyqa, mayta phiñakuspa chay kamachita wajyachispa nisqa: “Sajra kamachi, noqaqa tukuy manuykita perdonarqayki, mayta mañakuwasqaykirayku. ¿Manachu qanpis kamachi masiykita khuyakunallaykitaj karqa, imaynatachus noqapis qanta khuyakorqayki ajinata?”, nispa. Reyqa mayta phiñakuspa, chay sajra kamachinta carcelerosman jaywaykusqa tukuy manunta kutichipunankama. Chantá Jesusqa nerqa: “Kikillantataj cielopi kaj Tatayqa qankunata ruwasonqachej, manachus sapa ujniykichej tukuy sonqo hermanoykichejta perdonankichej chayqa”, nispa (Mateo 18:32-35).

Jesuspa nisqanmantaqa wajkunata perdonanapuni kasqanta yachakunchej. Noqanchejqa juchasapas kasqanchejrayku, Diosman may chhika manupis kasunman jina kanchej. Jinapis Diosqa juchasninchejta perdonawanchej, may chhika kajtinpis. Chayrayku hermanosninchejpa juchasninkuta perdonananchej tiyan. Hermanosninchejpa juchasninkutaj pisilla kanku, noqanchejpaj juchasninchejta Dios perdonawasqanchejmanta nisqaqa. Jehová Diosqa mana uj kutillatachu perdonawanchej, manachayqa may chhika kutista. Chayrayku hermanosninchejta mana perdonanapaj jina kajtinkupis, perdonananchej tiyan. Chayta ruwajtinchejqa, Diospis juchasninchejta perdonawasun (Mateo 6:12).