“Espíritu santowan juntʼasqa karqanku”

1. ¿Imaynataj karqa Pentecostés Fiesta?

JERUSALENQA may juntʼa kasharqa.a Altarmanta qʼoshñeqa templomanta pataman llojsisharqa, levitastaj Hallel nisqa takiyta takisharqanku (Salmos 113-118). Ichapis wakenqa uj parteta takerqanku, wakintaj takispa chayman kuticherqanku. Jerusalén callesqa may juntʼa kasharqa, imaraykuchus runasqa may karu lugaresmanta jamusqanku: Elammanta, Mesopotamiamanta, Capadociamanta, Pontomanta, Egiptomanta, Romamanta ima.b ¿Imamantaj runas rerqanku? Pentecostés Fiestaman, nisunman ‘ñaupaj kaj poqoy fiestaman’ (Núm. 28:26). Chay kusiy fiestataqa sapa wata ruwajpuni kanku grano cosecha chayri cebada cosecha tukukuyta, trigo cosecha qallariytataj.

2. ¿Imataj pasarqa Pentecostés Fiestapi?

² 33 watapi chʼaki tiempo qallariyta, las 9 de la mañana chayta uj tʼukuna ima pasarqa, chaytaj yuyarisqapuni kanan karqa. Chay paqarenqa “ujllata sinchʼi wayraj sonaynin jina cielomanta sonamorqa” (Hech. 2:2). Chay sonaytaj 120 discípulos jina tantasqa kasharqanku chay wasi ukhuman juntʼaykorqa. Tʼukunapaj jinataj nina lauray qallus jina rikhurerqa, chaytaj sapa ujpa patanman tiyaykorqa.c Chantá discipulosqa “espíritu santowan juntʼasqa karqanku, waj parlaykunapitaj parlayta qallarerqanku”. Discípulos wasimanta llojsejtinkutaj waj llajtayoj runasqa tʼukulla kasharqanku, imaraykuchus creejkunata “uyarisharqanku paykunaj parlayninkupi parlajta” (Hech. 2:1-6).

3. 1) ¿Imataj rikhurerqa Pentecostés Fiestapi? 2) ¿Imatá Pedro ruwarqa Gobiernoj ujnin llavenwan?

³ Pentecostés Fiestapi rikhurerqa Diospa llajtan Israel, nisunman ajllasqa cristianos (Gál. 6:16). Jinapis mana chayllachu pasarqa. Aswan tarde ladota Pedroqa ashkha runasman parlarqa. Chay kutipitaj Pedroqa ‘Gobiernoj llavesninmanta’ ujninwan uj punkuta jina kicharerqa, waj llajtayoj runaspis Diospa Gobiernonman yaykunankupaj (Mat. 16:18, 19). Ñaupaj kaj llaveqa yanaparqa judiosta, judiospa yachachiyninta qhatejkunata ima sumaj willaykunata japʼikunankupaj, espíritu santowantaj ajllasqa kanankupaj.d Ajinamanta paykunaqa Diospa llajtan Israelmanta kayta aterqanku. Chayrayku paykunaqa Diospa Gobiernonpi reyestaj, sacerdotestaj kayta aterqanku (Apo. 5:9, 10). Aswan qhepamantaj samaritanospis, mana judío kajkunapis chayllatataj japʼiyta aterqanku. Pentecostés Fiestapi imachus pasasqanmanta, ¿imatá yachakunchej?

“Uj cheqallapi tukuyninku tantasqa kasharqanku” (Hechos 2:1-4)

4. ¿Imaraykutaj ninchej Diospa llajtan ñaupa tiempopiña rikhurisqanta?

⁴ Yachakorqanchej jina, cristiana congregacionqa 120 discipuloswan jinalla qallarerqa uj wasej alto patanpi. Chaypi “tukuyninku tantasqa” kajkunaqa espíritu santowan ajllasqa karqanku (Hech. 2:1). Chay diallataj may chhika runas bautizakorqanku. Chaymantapachataj Diospa llajtanqa mayta wiñashallanpuni. Kay tiempopi Diospa llajtanpi tiyan tukuynejmanta qharis, warmis ima. Paykunataj Diosta munakunku, ‘Diospa Gobiernonmantataj sumaj willaykunata jallpʼantinpi willashanku tukuy naciones yachanankupaj’. Chaytataj ruwashanku niraj tukukuy chayamushajtin (Mat. 24:14).

5. Diospa llajtan, ¿imatá ñaupa tiempopi ruwarqa, chanta imatá kay tiempopi ruwashan?

⁵ Diospa llajtanqa mayta yanaparqa, kallpacharqataj ajllasqa cristianosta, tiemponmantaj ‘waj ovejasmanta’ kajkunata (Juan 10:16). Pabloqa may sumajpaj qhawarqa hermanos purajmanta yanapanakusqankuta. Chayrayku Romamanta cristianosman nerqa: “Noqaqa rikuytapuni munashaykichej, Diosmanta qankunawan parlarinaypaj. Ajinamanta sinchʼita sayanaykichejpaj, astawanqa purajmanta kallpachanakunanchejpaj, qankunapis noqapis kikin creeyniyoj kasqanchejrayku”, nispa (Rom. 1:11, 12).

6, 7. Kay tiempopi Diospa llajtan, ¿Jesuspa kamachisqanta juntʼashanchu?

⁶ Kay tiempopi Diospa llajtanpis, imatachus ñaupa tiempopi Diospa llajtan ruwarqa chayllatataj ruwashan. Jesusqa discipulosninman uj sumaj llankʼayta qorqa. Chaytaj mana juntʼayta atinapaj jinallachu karqa. Pay nerqa: “Tukuy nacionesmanta runasta discipulosniyman tukuchimuychej. Paykunata bautizamuychej Tata Diospa sutinpi, Wawanpa sutinpi, espíritu santoj sutinpiwan. Paykunaman kasukuyta yachachimuychej imastachus noqa kamacherqaykichej chay tukuy imasta”, nispa (Mat. 28:19, 20).

⁷ Jehovaqa kay tiempopi testigosninwan chay llankʼayta ruwachishan. Mundontinpi ashkha parlaykuna kasqanrayku chay llankʼayqa mana juntʼayta atinapaj jinallachu. Jehovaj testigosnintaj chay llankʼayta juntʼashanchej, Bibliamanta orqhosqa publicacionestataj 1.000 kuraj parlaykunapi orqhoshanchej. Tantakuykunaman jamushanki, Diosmanta willamushanki, yachachimushankitaj chayqa, mayta kusikuy, imaraykuchus pisi runaslla Diospa sutinmanta sumajta sutʼinchayta atinku.

8. ¿Ima bendicionestataj congregacionpi japʼinchej?

⁸ Jehovaqa mundontinmanta hermanosta qowanchej kusisqallapuni kanapaj, kay llakiy tiempospitaj mana saykʼunapaj. Apóstol Pabloqa hebreota parlaj cristianosman nerqa: “Ujkuna ujkunawan purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj. Amataj tantakuykunaman riyta saqenachu, imaynatachus wakinkuna yachaykukunku ajinataqa. Astawanpis purajmanta kallpachanakuna, astawanraj Diospa pʼunchaynin qayllaykamushasqanta reparaspa”, nispa (Heb. 10:24, 25). Reparanchej jina, congregacionpeqa wajkunata kallpachayta atinchej, wajkunapis kallpachayta atiwanchej, chaytaj Jehovamanta uj sumaj bendición. Chayrayku hermanosmanta amapuni karunchakunachu, tantakuykunamanpis mana faltakuspa rinallapuni.

“Sapa ujninku [...] uyarisharqanku paykunaj parlayninkupi parlajta” (Hechos 2:5-13)

9, 10. ¿Imatá wakin hermanosninchej ruwanku waj parlayniyoj runasman willanankupaj?

⁹ Judioswan, judiospa yachachiyninta qhatejkunawanqa may kusisqaspunichá kasharqanku. Paykunaqa tukuyninku ichapis griegopi chayri hebreopi parlaj kanku. Jinapis Pentecostés Fiestapeqa “sapa ujninku creejkunata uyarisharqanku paykunaj parlayninkupi parlajta” (Hech. 2:6). Parlayninkupi sumaj willaykunata uyarisqankoqa sonqonkukamapunichá chayarqa. Jinapis noqanchejqa manaña uj milagronejta waj parlaykunapi parlayta atinchejchu. Ajinapis ashkha hermanosninchej tukuy nacionesmanta runasman Diospa Gobiernonmanta willashanku. Wakin hermanosninchejqa waj parlaypi kaj congregacionman chayri waj suyuman ripunankupaj waj parlayta yachakunku. Paykunataj reparanku ajinata yachakusqankurayku wajkuna tʼukusqankuta.

¹⁰ Ajina pasarqa Christine sutiyoj hermanawan, payqa waj qanchis hermanoswan khuska gujaratí parlayta yachakorqa. Hermananchejpa trabajonmanta compañeranqa gujaratí parlayta parlaj, hermananchejtaj chay parlaypi payta saludarqa. Compañeranqa tʼukulla kasharqa, taporqataj imaraykuchus chay parlayta yachakushasqanta. Hermananchejtaj chay tapuyman kutichispa Diosmanta sumajta willarerqa, compañerantaj nerqa: “Nichá waj religionesqa ninkumanchu iglesiankuman rejkunata parlayniykuta yachakunankuta, imajtinchus parlayniykoqa may difícil. Imatachus yachachiyta munasqaykichejqa may sumajpunichá”, nispa.

11. ¿Imaynatá wakichikusunman waj parlayniyoj runasman willanapaj?

¹¹ Mana tukuypunichu waj parlayta yachakuyta atinchej. Jinapis sumajta wakichikusunman Diospa Gobiernonmanta waj parlayniyoj runasman willanapaj. ¿Imaynatá chayta ruwasunman? Chaypajqa JW Language^® nisqa aplicacionwan yanapachikusunman. Chay aplicacionwan yachakuwaj waj parlaypi saludariyta, wakin palabrasta ima. Ajinamanta runas Diosmanta astawan yachakuyta munanqanku. Chantá niwaj Internetpi jw.org paginanchejta maskʼanankuta, chayri qanpuni rikuchiwaj ima videoschus, ima publicacioneschus parlayninkupi kasqanta. Chay yanapaswan sumajta yanapachikuna, ajinamanta maytapuni kusikusun ñaupa tiempomanta cristianos jina runasman sumaj willaykunata parlayninkupi willaspa.

“Pedrotaj [...] sayarispa jatunmanta parlarqa” (Hechos 2:14-37)

12. 1) ¿Imatataj Jehová nerqa profeta Joelnejta? 2) ¿Imaraykutaj Jesuspa discipulosnin suyakusharqankupuni Joelpa profecian juntʼakunanta?

¹² Pedrotaj sayarispa tukuy lugaresmanta runas tantasqa kasharqanku chaykunaman parlarqa (Hechos 2:14). Paykunamanqa sutʼincharqa imaraykuchus discípulos waj parlaykunapi parlashasqankuta. Pay nerqa imatachus Dios profeta Joelnejta nisqan juntʼakushasqanta. Dios nerqa: “Tukuy laya runasman espirituyta tʼakaykamusaj”, nispa (Joel 2:28). Chay profecía juntʼakunantaqa ñaupa tiempomanta cristianos suyasharqankupuni. Imaraykuchus Jesús niraj cieloman wicharipushaspa discipulosninman nerqa: ‘Noqa Tataymanta mañapusqaykichej, paytaj waj yanapajta qosonqachej’, nispa (Juan 14:16, 17).

13, 14. 1) ¿Imatá Pedro ruwarqa runaspa sonqonkuman chayananpaj? 2) ¿Imaynatá Pedro jina ruwasunman?

¹³ Pedroqa discursonta tukuchashaspa kayta sutʼita nerqa: “Tukuy israelitas sutʼita yachachunku, Diosqa Jesusta churasqanta Señor kananpaj, Cristo kananpajtaj. Paytamin qankunaqa rakhu kʼaspipi wañucherqankichej”, nispa (Hech. 2:36). Paykunamanta ashkhasqa Jesusta wañuchishajtinku mana chaypichu kasharqanku. Jinapis paykunaqa ima nacionchus Jesusta wañucherqa chay nacionmanta kasqankurayku juchayojllataj karqanku. Jinapis apóstol Pedroqa judío hermanosninman respetowan parlarqa sonqonkuman chayayta munaspa. Pedroqa mana paykunata juchachaytachu munasharqa, manaqa pesachikunankupaj yanapayta munasharqa. Paykunataj mana phiñakorqankuchu. Astawanpis “maytapuni pesachikorqanku”. Chayrayku Pedrota taporqanku: “¿Imatataj ruwasqaykuri?”, nispa. Arí, Pedroj parlasqanqa sonqonkuman chayarqa, ashkhas pesachikunankupajtaj yanaparqa (Hech. 2:37).

¹⁴ Noqanchejpis Pedro jina runaspa sonqonkuman chayayta munanchej. Diosmanta willashaspaqa runas imapichus pantasqa kasqankumanta mana tukuynintachu sutʼinchanchej. Astawanpis imapichá paykuna noqanchej jinallataj yuyanku, chaymanta astawan parlarinchej, ajinamanta yanapariyta atinchej Diospa Palabranta entiendenankupaj. Pedro jina respetowan parlasun chayqa, kʼacha sonqoyoj runasqa Bibliaj nisqanta japʼikuyta munallanqanku.

“Sapa ujniykichejtaj [...] bautizakuychej” (Hechos 2:38-47)

15. 1) ¿Imatataj Pedro nerqa judiosman, judiospa yachachiyninta qhatejkunaman ima? 2) ¿Imatá paykuna ruwarqanku? 3) ¿Imaraykutaj ninchej judioswan, judiospa yachachiyninta qhatejkunawan bautizakunankupaj wakichisqa kasqankuta?

¹⁵ Pedroqa 33 watamanta Pentecostés Fiestapi sumaj willaykunata japʼikoj judiosman, judiospa yachachiyninta qhatejkunaman ima nerqa: “Juchasniykichejmanta pesachikuychej, sapa ujniykichejtaj [...] bautizakuychej”, nispa (Hech. 2:38). Chayrayku chay diaqa 3.000 runas jinapuni bautizakorqanku. Paykunataqa ichapis Jerusalenpi kaj estanquespi, muyuyninpi kaj estanquespitaj bautizarqanku.e ¿Wajkunata bautizakojta rikuspallachu paykuna bautizakorqanku? ¿Chay niyta munanchu Bibliamanta yachakojkuna, testigospa wawasninkupis niraj wakichisqachu kaspapis usqhayllata bautizakunanku kasqanta? Mana. Pentecostés Fiestapi bautizakoj judioswan, judiospa yachachiyninta qhatejkunawanqa Diospa Palabranta sumajtaña rejserqanku, Diospa llajtanmantataj karqanku. Chantapis paykunaqa Diosta tukuy sonqo yupaychayta munasqankuta rikucherqankuña, imaraykuchus paykunamanta wakenqa Pentecostés Fiestapi kanankupaj karuta viajarqanku. Paykunamanqa imaynatachus Cristo Diospa munaynin juntʼakunanpaj yanapakusqanta yachanallankuña faltarqa. Chayta yachaytawantaj Diosta sirvinallankupajpuni Cristoj discipulosnin jina bautizakunankupaj wakichisqa kasharqanku.

16. Ñaupa tiempomanta cristianos, ¿imastá ruwarqanku kʼachas kasqankurayku?

¹⁶ Jehovaqa Pentecostés Fiestapi bautizakojkunata bendecillarqapuni. Biblia nin: “Mosoj creejkunaqa khuskallapuni kaj kanku, kapuyninkumantataj jaywarinakoj kanku. Jallpʼasninkuta, tukuy kapuyninkutawan vendespataj, chay qolqeta tukuyman rakʼiraj kanku, sapa uj pisichikusqanman jina”, nispa (Hech. 2:44, 45).f Kay tiempomanta cristianospis paykuna jinallataj kʼachas kayta munanchej, qorikuytataj munanchej.

17. ¿Imastataj uj runa ruwanan tiyan bautizakunanpaj?

¹⁷ Biblia nisqanman jina, ¿imastataj uj runa ruwanan tiyan Jehovaman kausayninta qopunanpaj, bautizakunanpaj ima? Ñaupajtaqa Bibliaj nisqanta yachakunan tiyan (Juan 17:3). Chantaqa Diospi creenan tiyan, juchasninmanta tukuy sonqo pesachikusqantaj kausayninpi sutʼi rikukunan tiyan (Hech. 3:19). Chantá kausayninta cambianan tiyan, Jehová nisqanman jinataj kausakunan tiyan (Rom. 12:2; Efe. 4:23, 24). Chaymantaraj Jehovaman orakuyta atenqa kausayninta payman qopunanpaj, chaymantataj bautizakuyta atenqa (Mat. 16:24; 1 Ped. 3:21).

18. ¿Uj bautizasqa cristiano ima sumaj ruwaytataj ruwayta atin?

¹⁸ Qanrí, ¿kausayniykita Jehovaman qopuspa bautizakunkiñachu? Jina kajtenqa ñaupa cristianosman jina qanmanpis Jehová espíritu santonta qollasonqataj cheqa kajmanta allinta sutʼinchanaykipaj, munaynintataj ruwanaykipaj. Chay ruwayqa may sumajpuni.