6 YACHAQANA

¿Wañusqas kausarimuyta atinkumanchu?

1. ¿Wañusqas kausarimuyta atinkumanchu?

Martawan Mariawanqa hermanonku Lázaro kausarimusqanmanta kusisqa kashanku

Uj kuti Jesusqa Betania ranchoman chayarqa. Chay ranchoqa Jerusalén qayllallapi kasharqa. Chaypitaj Jesusqa yacharqa amigon Lázaro tawa diaña pʼampasqa kashasqanta. Jinapis Jesusqa Lazaroj hermanasninwan maypichus pʼampasqa kasharqa, chayman rerqa. Ashkha runas qhawashajtinkutaj Lazarota kausaricherqa. Martawan Mariawanqa chayta rikuspa, ¡maytachá kusikorqanku! Juan 11:21-24, 38-44 leey.

Martaqa yacharqaña Jehová Diosninchej wañusqasta kausarichimunanta. Chantapis yachallarqataj kausarimojkuna kay jallpʼapi watejmanta kausakunankuta. Isaías 26:19 leey.

2. ¿Wañusqas imatapis sientenkuchu?

Adanta Jehová Dios ruwarqa, Adantaj qhepaman wañuporqa — Dios, Adanman nerqa: “Jallpʼa kanki, jallpʼallamantaj kutinki”, nispa (GÉNESIS 3:19).

Runaqa ñutʼu jallpʼamanta ruwasqa kanchej (Génesis 2:7; 3:19). Mana almayojchu kanchej. Chayrayku wañupojtinchejqa mana imanchejpis kausashaj qhepakunchu. Yuyayninchejpis chinkapun, imaraykuchus ñojtunchejqa sayapun. Chayrayku Lazaropis kausarimuytawan mana nerqachu “cieloman riporqani”, chayri “infiernopi kasharqani” nispa. Salmo 146:4; Eclesiastés 9:5, 6, 10 leey.

Wakin runasqa Dios wañusqasta nina lauraypi ñakʼarichisqanta ninku. Chaytaj mana jinachu. Bibliaqa niwanchej wañuspa mana maymanpis risqanchejta. Chayrayku infiernoman risqanchejta nisqankoqa llulla, Jehová Diospa sutintataj chʼichichan. Diosqa runata ninapi qʼolachiyta millaypaj qhawan. Jeremías 7:31 leey.

Kay ¿Wañusqas imatapis sientenkuchu? nisqa videota qhawariy.

3. ¿Wañusqaswan parlayta atisunmanchu?

Wañusqasqa mana parlankuchu, nitaj imatapis uyarinkuchu (Salmo 115:17). Chaywanpis sajraman tukoj angelesqa, runasta creechinku wañusqas parlayta atisqankuta (2 Pedro 2:4). Chayrayku Jehová Diosqa manapuni munanchu aysirisman rinanchejta. Deuteronomio 18:10, 11 leey.

4. ¿Pikunataj kausarimonqanku?

Uj runa wañuymanta kausarichisqa kaspa paraisopi Diosmanta yachakushan. Chantá payñataj waj kausarimojkunata yanapashan.

May chhika runas kausarimonqanku, kay jallpʼapitaj tiyakonqanku. Jehová Diosta mana rejsispa sajra imasta ruwajkunapis, kausarimonqanku. Lucas 23:43; Hechos 24:15 leey.

Kausarimojkunaqa Diosmanta yachakuyta atenqanku. Chantapis Jesusta kasukuspa, paypi creesqankuta rikuchiyta atenqanku (Apocalipsis 20:11-13). Chayta ruwajkunataj, jallpʼapi kusisqas wiñaypaj kausakonqanku. Juan 5:28, 29 leey.

5. Wañusqas kausarimunanku, ¿imatá Jehová Diosmanta rikuchiwanchej?

Jehová Dios munakuwasqanchejta, jatun khuyakuyniyojtaj kasqanta. Arí, Wawanta noqanchejrayku wañunanpaj kachamusqanrayku, wañusqas kausarimunankuta suyakuyta atinchej. Wañusqas kausarimojtinku, ¿piwantaj tinkuyta munawaj? Juan 3:16; Romanos 6:23 leey.

Astawan yachakuyta munaspaqa, ¿Imastá Biblia yachachiwanchej? libroj 6, 7, 10 capitulosninta leeriy.