KINSA KAJ RAKʼIY

Chʼampaykunata allinchay

“Qankunapura tukuy sonqo munanakuychej, imaraykuchus munakoyqa ashkha juchata pʼampan.” (1 Pedro 4:8)

Qhariwarmi kausaypeqa chʼampaykuna rikhurenqapuni, mana kikinta yuyasqankurayku, waj jina uywasqa kasqankurayku ima. Chaywanpis wakin kuteqa mana suyasqallanku ima chʼampaypis rikhurinman.

Chayrayku Biblia niwanchej ima chʼampaytapis usqhayllata allinchanata (Mateo 5:23, 24). Bibliaj yuyaychaykunasninman jina ruwajtiykichejqa may allin risonqachej.

1 CHʼAMPAYNIYKICHEJMANTA PARLARIYCHEJ

BIBLIA NIN: “Uj tiempoqa tiyan [...] parlanapaj”, nispa (Eclesiastés 3:1, 7). Chayrayku chʼampayniykichejmanta parlanapaj tiempochakuychej, mana llullakuspataj parlaychej imatachus munasqaykichejmanta, yuyasqaykichejmanta ima (Efesios 4:25). Phiñasqa kanki chayqa, ama maqanakuta maskʼaychu. Kʼachamanta parlasqaykichejqa mana maqanakunaykichejpaj yanapasonqachej (Proverbios 15:4; 26:20).

Mana kikinta yuyaspapis kʼachamanta, munakuywan, jatunpaj qhawanakuspataj parlariychej (Colosenses 4:6). Usqhayllata chʼampayniykichejta allinchaychej, amataj phiñasqallapuni qhepakuychejchu (Efesios 4:26).

Uj qhariwarmi chʼampayninkumanta parlarishanku

KAYTA RUWAWAJ:

Chʼampayniykichejta allinchanaykichejpaj tiempochakuychej
Qosayki chayri warmiyki parlashajtenqa ama pantachiychu. Chaymanta qan parlallanki

2 UYARIYTAJ, ENTIENDEYTAJ

BIBLIA NIN: “Tukuy sonqo munanakuychej, ujkuna ujkunata aswan allimpaj qhawaspa”, nispa (Romanos 12:10). Amigos jina, “sumaj sonqo[wan]”, “llampʼu sonqo[wantaj]” uyarinakuychej, entiendenakuychej ima (1 Pedro 3:8; Santiago 1:19, 20). Qosayki chayri warmiyki qanwan parlariyta munajtenqa, ruwanasniykita saqespa sumajta uyariy, manachayrí ima ratochus parlarinaykichejta tapuriy. Qosaykita chayri warmiykita amigoykita jina qhaway, amataj enemigoykita jinaqa. Jinamanta mana usqhayllata phiñanakunkichejchu (Eclesiastés 7:9).

KAYTA RUWAWAJ:

Mana allin rijchʼasojtinpis imatachus qosayki chayri warmiyki nisusqanta uyarillay
Imatachus niyta munashasusqanta parlayninpi, imayna uyawanchus nisusqanpipis reparay

3 KALLPACHAKULLAYCHEJPUNI

BIBLIA NIN: “Tukuy sonqo trabajasqamantaqa ashkhata ganakunchej; parlallanchej imatapis chayri, wajchayaylla jamun”, nispa (Proverbios 14:23). Ama nillaychejchu chʼampayniykichejta allinchanaykichejtaqa manachayqa, nisqaykichejman jina ruwaychej. Ajinata ruwanaykichejpaj, ichá mayta kallpachakunaykichej tiyan, chaywanpis allin risonqachej (Proverbios 10:4). Khuska llankʼaspaqa ashkha bendicionesta japʼinkichej (Eclesiastés 4:9).

KAYTA RUWAWAJ:

Sapa ujniykichej yuyaychakuychej imaynasmantachus chay chʼampayta allinchanaykichejta
Sapa kuti qhawaychej imaynachus risusqaykichejta