Sajra kamachejmanta ayqekunku

Uj tuta, Jehová Diospa angelnenqa Joseman mosqoypi rikhurerqa, nerqataj: “Sayariy, wawata mamantawan pusariykukuspa Egiptoman ayqey, chaypitaj qhepakunkichej willasunaykama, imaraykuchus Herodesqa wawata maskʼanqaña wañuchinanpaj”, nispa (Mateo 2:13). Joseqa chay ratopacha Mariata rijchʼaricherqa, angelpa nisqantataj willarqa.

Chantá chay chʼisipacha usqhayllata Egiptoman ayqerqanku. Walejtachá usqhayllata ayqekorqanku. Imaraykuchus  rey  Herodes  yachasqaña chʼaskasta qhawaj yatiris engañaykusqankuta. Paykunaqa wawitata tariytawan Herodesman kutinanku karqa. Paykunatajrí mana ni imata willaspalla waj ñanta llajtankuman kutiporqanku. Herodesqa rabiamanta wañusharqaña. Jesusta wañuchiytapuni munaspataj, runasninta Belenman kacharqa. Runasnintajrí chay llajtamanta, tukuy muyuyninmantawan, qhari wawitasta wañucherqanku, iskay watayojmanta uraman. Herodesqa ajinata kamacherqa, inti llojsimuynejmanta yatirista allinta tapusqanman jina.

Sajra rey Herodesqa sonqo nanayta qhari wawitasta wañuchicherqa. Mana yachanchejchu mashkha wawitastachus wañuchisqankuta. Jinapis mamasninkoqa jikʼun jikʼunta waqarqanku. Chay waqasqankutaj profeta Jeremiaspa nisqanta juntʼarqa (Jeremías 31:15).

Chay imas Belenpi kanankama, Josewan familianwanqa Egiptopiña kasharqanku, chaypitaj tiyakorqanku. Chantá uj tuta, Jehová Diospa angelnin ujtawan Joseman rikhurerqa, nerqataj: “Sayariy, wawata mamantawan Israel jallpʼaman pusakapuy, imaraykuchus wawata wañuchiyta munajkunaqa wañunkuña”, nispa (Mateo 2:20). Joseqa chayta uyarispa, familianta Israelman pusakaporqa. Ajinamanta profeta Oseaspa nisqan juntʼakorqa. Chay profetaqa ñaupajtaña nerqa, Jehová Diosqa Wawanta Egiptomanta wajyakapunanta (Oseas 11:1).

Israelman kutiytawan, Joseqa familianwan Judea jallpʼapisina tiyakuyta munarqa, Belén llajta chaynejpi. Paykunaqa niraj Egiptoman ayqekushaspa, chaypi tiyakorqanku. Jinapis Joseqa uyarerqa, Herodespa cuentanmanta sajra rey Arquelao Judeapi kamachishasqanta. Chantapis Diosqa Joseman mosqoypi willarqa, ama Belén chaynejpi qhepakunanta. Chayrayku Joseqa familianta Galilea jallpʼaman pusakaporqa, Nazaret nisqa llajtapitaj tiyakorqanku. Nazaretqa Jerusalenmanta karupi kasharqa, aswan pata ladopitaj. Jesusqa chay llajtapi wiñarqa. Ajinamantataj profetaspa kay nisqanku juntʼakullarqataj: “Nazareno sutichasqa kanqa”, nispa (Mateo 2:23).