Jehová Diosqa Jesusta jarkʼarqa

Israelmanta inti llojsimuy ladopi kaj llajtasmanta runasqa, creej kanku “estrellas” runasta pusaykachasqanta. Uj chʼisi, chay ladomanta wakin runas cielopi uj purej estrellata rikorqanku, qhepantataj rerqanku. Chay estrellaqa paykunata Jerusalenman pusarqa. Chaypitaj tapukorqanku: “¿Maypitaj kashan judiospa reynin nacekojri? Ñaupaqenman kʼumuykukoj jamuyku”, nispa.

Jerusalenmanta rey Herodesqa, chay reymanta uyariytawan mancharikorqa. Kuraj sacerdotestataj taporqa: “¿Maypí chay rey nacekunan karqa?”, nispa. Paykunataj nerqanku: “Profetasqa Belenpi nacekunanta nerqanku”, nispa. Chantá Herodesqa wawitata maskʼasharqanku chay runasta wajyachispa nerqa: “Riychej, chay wawata allinta maskʼamuychej. Wawata tarispataj kutimuspa willawankichej, noqapis rispa ñaupaqenman kʼumuykakamunaypaj”, nispa. Chay nisqantaj llulla karqa.

Chay runasqa estrella purirejtin Belenkama estrellaj qhepanta rerqanku. Chantá chay estrellaqa uj wasej patanpi sayaykorqa. Chay wasiman yaykojtinkutaj wawata rikorqanku maman Mariatawan. Chay runasqa chay wawaman qonqoriykukuspa qorita, yuraj inciensota, mirratawan jaywarqanku. Chay runastaqa mana Jehová Dioschu Jesusman kacharqa.

Chay chʼisi Jehová Diosqa uj mosqoypi Joseman nerqa: “Herodes Jesusta wañuchiyta munan. Sayariy, wawata mamantawan pusariykukuspa Egiptoman ayqekuy, chaypi qhepakunkichej willasunaykama”, nispa. Josetaj chay rato familianta Egiptoman pusarqa.

Jehová Diosqa inti llojsimuynejmanta runasman nerqa ama Herodespaman kutinankuta. Herodesqa chay runas mana kutejtinku mayta phiñakorqa. Jesusta mana tarispataj, kamacherqa Belenmanta Jesús edadniyoj qhari wawasta wañuchinankuta. Jinapis Jesustaqa mana wañucherqankuchu Egiptopi kashasqanrayku.

Tiemponmanqa Herodes wañorqa. Jehová Diostaj Joseman nerqa: “Wawata wañuchiyta munajkunaqa wañunkuña, kutipullaychejña”, nispa. Chantá Israelman kutipuspa Nazaretpi tiyakorqanku.