86 yachachiy
Juk chʼaskata qhatinku
¿CHAY chʼaska chay runasman ñanta rikuchisqanta rikunkichu? Jerusalenmanta lluqsichkaptinku paykunaman chay chʼaska rikhurirqa. Paykunaqa chʼaskasmanta yachanku, Inti lluqsimuyniqmantataq jamunku. Chay chʼaska juk sumaq runaman apachkasqanta creenku.
Kay runasqa Jerusalenman chayaytawan, tapurqanku: ‘¿Maypitaq kachkan judiospa nacekuq reynin?’, nispa. Israelitasta “Judíos” nispa sutichakullarqataq. Paykunataq nirqanku: ‘Inti lluqsimuqniqpi chʼaskanta rikuyku. Chayrayku payta yupaychaq jamuyku’, nispa.
Herodes, Jerusalenpa reynin, kayta uyariytawan mana imanakuyta atirqachu. Payqa mana wak rey kananta munarqachu. Chayrayku, kuraq sacerdotesta tapurqa: ‘¿Maypitaq Cristo nacekunan karqari?’, nispa. Paykunataq nirqanku: ‘Diospa rimaynin nin: Belén llaqtapi’, nispa.
Chaymanta, Herodes Inti lluqsimuyniqmanta runasman nirqa: ‘Chay wawitata maskʼamuychik. Tarispataq, willawankichik. Ñuqapis payta yupaychayta munani’, nispa. Chayta nispapis ¡Herodesqa wawitata wañuchiyllata munarqa!
Chay chʼaskaqa chay runaspa ñawpaqinkuta rispa Belenman chayachirqa. Maypichus wawita kachkarqa chaypi sayarqa. Chay runakunataq wasiman yaykuytawan Mariata wawitatawan tarirqanku. Jesusman regalosta qurqanku. Chaymanta, Jehová juk musquypi ama Herodesman kutinankuta nirqa. Chayrayku, wak ñanta ripurqanku.
Herodes chay runas ripusqankumanta yachaspa, mayta phiñakurqa. Chayrayku, Herodes wawitasta 2 watitayuqmanta uraman, wañuchinankuta kamachirqa. Manaraq chayta ruwakuchkaptin, Jehová Joseman juk musquypi, familianwan Egiptoman aqinanta nirqa. Chaymanta Herodes wañusqanta uyariytawan, Nazaretman kutimurqanku. Chaypitaq Jesús wiñakurqa.
¿Yanchankichu pichus chay chʼaskata kʼancharichirqa? Yuyariy, kay runasqa chay chʼaskata qhawaspa, Jerusalenmanraq rirqanku. Supay Diospa wawanta wañuchiyta munarqa, payqa Herodespis wawitata wañuchiyta munasqanta yacharqa. Chayrayku, Supay chay chʼaskata apaykachasqanta nisunman.