Jesusqa Nicodemoman tuta yachachin

Jesusqa, 30 wata qallariyta Jerusalenman Pascuapaj rerqa. Jerusalenpitaj milagrosta ruwarqa, ashkha runastaj paypi creerqanku. Chaykunamanta ujqa, Nicodemo karqa. Payqa fariseospa religionninkumanta karqa, judiospa Jatun Juntankupipis cargoyoj karqa. Nicodemoqa Jesusmanta astawan yachakuyta munarqa. Judiosta kamachejkunata manchachikusqanraykutaj, Jesusta tutan watukoj rerqa.

Pay Jesusman nerqa: “Yachachejníy, yachayku Dios kachamususqanta yachachinawaykupaj. Ni pipis chay ruwasqayki milagrostaqa ruwayta atinmanchu, manachus Dios payman atiyta qonman chayqa”, nispa. Jesustajrí Nicodemoman nerqa: “Sichus pipis mana watejmanta nacekunchu chayqa, manapuni Diospa Gobiernonta rikuyta atinchu”, nispa (Juan 3:2, 3).

Nicodemotaj taporqa: “¿Imaynatataj uj runa watejmanta nacekunman machuña kaspari? ¿Ujtawanchu mamanpa wijsanman kutiykunman, watejmanta nacekunanpaj?”, nispa (Juan 3:4).

Jesusqa mana chaytachu nisharqa. Chayrayku Nicodemo entiendenanpaj nerqa: “Sichus pipis yakumanta, Diospa atiyninmantawan mana nacekunchu chayqa, mana Diospa Gobiernonman yaykuyta atinchu”, nispa (Juan 3:5). Jesuspis “yakumanta, Diospa atiyninmantawan” nacekorqa. Imajtinchus bautizakushajtenqa Diospa atiynin patanman uraykamorqa. Jehová Diostaj cielomanta nimorqa: “Kaymin munasqa Wawayqa, paytaqa allinpaj qhawani”, nispa (Mateo 3:16, 17). Ajinamanta Diosqa rikucherqa Jesusqa Wawan kasqanta, cieloman kutipunanta, Gobiernonmantaj yaykunanta. Chaymanta aswan qhepaman, Pentescostés 33 watapi, bautizasqa cristianos tantasqa kasharqanku. Tukuyninkutaj Diospa atiyninwan juntʼasqa karqanku. Ajinamanta paykunapis watejmanta nacerqanku, Diospa wawasnin kanankupaj, imaraykuchus Dios atiyninwan paykunata ajllarqa (Hechos 2:1-4).

Nicodemoqa Jesuspa nisqanta mana entiendeyta atillarqachu. Chayrayku Jesusqa imapajchus jamusqanta sutʼincharqa. Pay nerqa: “Imaynatachus Moisés chʼinnejpi katarita warkhorqa, ajinallatataj noqatapis warkhuwanqanku, noqapi tukuy creejkuna wiñay kausayniyoj kanankupaj”, nispa (Juan 3:14, 15).

Unay tiempopi, israelitas chʼin pampapi kashajtinku, venenoyoj katariswan khanichikorqanku. Sanoyakunankupajtaj Moisespa warkhusqan bronce katarita qhawarinanku karqa (Números 21:9). Noqanchejpis, juchamantawan wañuymantawan kacharichisqa kananchejpaj, wiñay kausaytataj tarinanchejpajqa, Jesuspi creenanchej tiyan. Chayta sutʼinchaytawan, Jesusqa Jehová Diospa munakuyninmanta parlarqa. Nicodemomantaj nerqa: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Ajinamanta Jesusqa rikucherqa, runasqa paynejta salvacionta tariyta atisqanchejta. Chaytaj karqa willayta qallarisqanmanta sojta killanman.

Chantá Jesusqa Nicodemoman nerqa: “Diosqa mana kay mundomanta runasta juzgananpajchu Wawanta kay mundoman kachamorqa, astawanqa paynejta kay mundomanta runas salvasqa kanankupaj kachamorqa”, nispa (Juan 3:17). Arí, Jesusqa mana runasta wañunankupaj juchachajchu kay mundoman jamorqa.

Nicodemoqa runasta manchikusqanrayku, Jesuspaman tutallan rerqa. Jesusqa ichapis chayrayku Nicodemowan parlayta tukushaspa nerqa: “Kʼanchayqa kay mundoman jamorqa, runastajrí kʼanchayta munakunankumantaqa, laqhata munakorqanku sajra imasta ruwasqankurayku. Chayrayku paykunaqa juchachasqa kanqanku. Sajra imasta ruwajqa kʼanchayta chejnikun, manataj kʼanchayman jamunchu, sajra ruwasqasnin mana sutʼinchasqa kananpaj. Cheqa kajta ruwajrí kʼanchayman jamun, ruwasqasnin sutʼinchasqa kananpaj, Diospa munayninman jina ruwasqanrayku”, nispa (Juan 3:19-21). Jesusqa ‘kʼanchay jamorqa’ nispa, paymanta, yachachisqanmantawan parlasharqa.

Jesusqa Nicodemoman sutʼincharqa, imapajchus Dios payta kachamusqanta. Nicodemotaj chaypi tʼukurinan karqa, ajllanantaj karqa imatachus ruwananta.