JESUSPA DISCIPULOSNINMAN TUKUCHIY
LECCIÓN 10
Mana saqespa yanapay
Bibliaj yuyaychasqan: “Mana Diospa sumaj willaykunasnillantachu qankunaman rejsichiyta munayku, manaqa kausayniykutapis qankunata yanapanaykupaj qoyta munayku” (1 Tes. 2:8).
Jesuspa ruwasqan
1. VIDEOTA qhawariy chayri Juan 3:1, 2 leeriy. Chantá kay tapuykunapi tʼukuriy:
¿Imaraykutaj Nicodemo chʼisin Jesuswan parlaj rinman karqa? (Juan 12:42, 43 qhawariy).
¿Imaraykutaj ninchej Diosmanta yachachiyta Jesús jatunpajpuni qhawasqanta?
¿Imatá Jesusmanta yachakunchej?
2. Runasta munakusqanchejrayku yanapayta munanchej Jesuspa discipulosninman tukunankupaj.
Jesús jina ruway
3. Estudioykiman Bibliamanta yachachiy ima horachus, maypichus yachakuyta munasqanman jina. ¿Pay nisunkichu ima diachus chayri ima horatachus yachakuyta munasqanta? ¿Maypi estudianaykichejtaj aswan allin kanman: trabajonpichu, wasinpichu chayri waj lugarpichu? Atisqaykiman jina, allin kanman estudioyki ima diachus, ima horachus yachakuyta munan chay horapi estudianaykichejpaj kallpachakunayki.
4. Allinpuni kanman mana faltakuspa estudiachinayki. Sichus estudiachej mana riyta atinki chayqa, ama niychu estudioykiman mana rinaykita. Astawanpis kay imasta ruwawaj:
Semanapi waj día estudiachiwaj.
Telefononejta chayri videollamadanejta estudiachiwaj.
Waj hermanota niwaj cuentaykimanta estudiachej rinanta.
5. Diosmanta mañakuy estudioykimanta allinta yuyanaykipaj. Jehovamanta mañakuy estudioykita mana saqespa yanapayta munanallaykipajpuni. Chaytaqa mañakuypuni estudioykiwan mana sapa semanachu estudiashankichej chay, chayri mana yachakusqanman jinachu ruwashan chay (Fili. 2:13). Jehovamanta mañakuy estudioykej allin ruwasqasninta qhawanaykipaj. Payqa ashkha allin imastapunichá ruwan.