Tawa pescadores runa japʼej pescadoresman tukunku

Yachakorqanchej jina, Jesustaqa Nazaretpi wañuchiyta munarqanku. Chayrayku payqa Capernaumman riporqa. Chay llajtaqa Galilea qocha kantupi karqa. Chay qochaj ujnin sutintaj “Genesaret” karqa (Lucas 5:1). Capernaumman rispa, Jesusqa profeta Isaiaspa nisqanta juntʼarqa. Chay profetaqa, Galileapi tiyakoj runas kʼanchayta rikunankuta nerqa (Isaías 9:1, 2).

Jesusqa Galileapi, “cielopi kaj Gobiernoqa qayllapiña kashan” nispa willallarqapuni (Mateo 4:17). Chantapis chaypi tawa yachachisqasninwan tinkorqa. Paykunaqa Jesuswan khuska Judeaman rerqankuña. Jinapis Galileapeqa, llankʼayninkuman kutiporqanku (Juan 1:35-42). Jesustajrí Capernaumman chayaspa yachachisqasninta wakichiyta munarqa. Ajinamanta sapallankuña kaspa, Diospa Gobiernonmanta willanallankupajpuni.

Jesusqa Galilea qocha kantuman rerqa, chaypitaj Pedrota, hermanon Andrestawan rikorqa. Paykunaqa waj pescadoreswan chʼipasninkuta tʼajsasharqanku. Jesusqa Pedroj canoanman wicharerqa, imaraykuchus ashkha runas yachachisqanta uyarinankupaj jamusqanku. Chantá Jesusqa Pedrota nerqa canoata qocha ukhunejman ithirichinanta. Ithirichejtinñataj tiyaykuspa canoamantapacha Diospa Gobiernonmanta yachachiyta qallarerqa.

Chantá Jesusqa Pedrota nerqa: “Canoaykita aswan ukhunejman apay, chantá chʼipasniykichejta yakuman wijchʼuykuychej pescadosta japʼinaykichejpaj”, nispa. Pedrotaj kuticherqa: “Yachachejníy, tutantintaña pescadosta japʼej churakuyku, nitaj uj pescadollatapis japʼiykuchu. Qan niwasqaykiraykulla chʼipasta yakuman wijchʼuykusaj”, nispa (Lucas 5:4, 5).

Chantá paykunaqa chʼipasninkuta yakuman wijchʼuykorqanku, may chhika pescadostataj japʼerqanku. Chʼipasninkupis llikʼirakusharqaña. Chayrayku waj canoapi kajkunata wajyakorqanku. Jamojtinkutaj, iskaynin canoasman pescadosta juntʼaykucherqanku. Canoasninkutaj chinkaykoj jinaña kasharqanku. Chayta rikuspa, Pedroqa Jesuspa ñaupaqenpi qonqoriykukuspa nerqa: “Señor, ithirikuy. Noqaqa juchasapa runa kani”, nispa. Jesustaj nerqa: “Amaña mancharikuychu. Kunanmantaqa runastañataj pescadosta jina japʼinki”, nispa (Lucas 5:8, 10).

Chantá Jesusqa Pedrota Andrestawan nerqa: “Qhepayta jamuychej, runa japʼej pescadoresman tukuchisqaykichej”, nispa (Mateo 4:19). Chaymanta Jesusqa iskay pescadorestawan qhepanta rinankupaj wajyarqa. Paykunaqa karqanku Santiagowan Juanwan, Zebedeoj wawasnin. Chay tawantin pescadoresqa chʼipasninkuta saqerpayaspa, chay rato Jesuspa qhepanta rerqanku, manañataj llankʼayninkuman kuterqankuchu.