Wawayoj karqanku

Abrahanwan Sarawanqa ashkha watasña casarasqa karqanku. Paykunaqa Ur llajtapi sumaj wasinkuta saqespa toldospi tiyakorqanku. Saraqa Jehová Diospi atienekusqanrayku mana imamantapis quejakorqachu.

Payqa maytapuni wawayoj kayta munaspa Abrahanman nerqa: “Sichus kamachiy Agar qanpaj wawayoj kanqa chayqa, chay wawaqa waway jina kanqa”, nispa. Aswan qhepamantaj Agarqa Abrahanpaj wawayoj karqa. Chay wawataj Ismael sutikorqa.

Aswan qhepamantaj, kinsa runas Abrahanta watukoj rerqanku. Chaypacha Abrahanqa 99 watasniyoj kasharqa, Sarataj 89 watasniyoj. Abrahanqa chay kinsa runasta sachʼa urapi tiyarikunankuta nerqa, mikhunatapis jaywarqa. Chay kinsa runasqa ángeles karqanku. Ujnin angeltaj Abrahanman nerqa: “Watapaj warmiyki wawitayoj kanqa”, nispa. Sarataj chayta toldo ukhumanta uyariytawan asiykukorqa. Sonqonpitaj nerqa: “Kay jina viejitachu wawayoj kasaj”, nispa.

Watanmantaj, Saraqa Jehová Diospa angelnin nisqanman jina wawayoj karqa. Abrahantaj chay wawaman Isaac sutita churarqa, chaytaj niyta munan “asikuy”.

Isaac phishqa watayoj jina kashajtin, Saraqa sapa kuti rikorqa Isaacta Ismael asipayashasqanta. Saraqa wawanta cuidayta munarqa. Chayrayku Abrahanta nerqa: “Agarta wawantawan wijchʼuy”, nispa. Abrahantaj mana munarqachu. Chayrayku Jehová Dios nerqa: “Kasuy warmiyki Sarata. Noqa Ismaelta cuidallasaj. Imaraykuchus mirayniykeqa jatunyanqa Isaacnejta”, nispa.