Lotpa warminmanta yuyarikuna

Lotqa Canaán jallpʼapi tion Abrahanwan tiyakorqa. Paykunaj animalesninkoqa mayta mirarqanku, michinankupajtaj manaña campo karqachu. Chayrayku Abrahanqa Lotta nerqa: “Manaña khuska tiyakuyta atisunmanchu. Chayrayku ajllakuy maymanchus riyta munasqaykita, noqataj waj ladoman ripusaj”, nispa.

Lotqa uj lugar may kʼachitu kasqanta rikorqa. Chaypeqa pastowan yakuwan jinantin karqa. Chayraykutaj chayta ajllaspa, chayman familianwan riporqa. Chaytaj Sodoma llajta qayllapi kasharqa.

Sodoma llajtamanta runaspis, chay qayllapi kaj Gomorra llajtamanta runaspis may sajras karqanku. Chayrayku Jehová Diosqa chay llajtasta chinkachinanta nerqa. Jinapis Lotta, familiantawan salvayta munarqa. Chayrayku iskay angelesta Lotman kacharqa. Chay angelestaj Lotta nerqanku: “Usqhayta ripuychej. Jehová Dios kay llajtata chinkachenqa”, nispa.

Lottajrí mana usqhaytachu riporqa. Chayrayku chay angelesqa Lotta, warmintawan, wawasnintawan llajtamanta jawaman aysarqanku. Chantá angelesqa nerqanku: “Usqhayta ayqeychej mana wañunaykichejpaj. Ama qhepata qhawarikamunkichejchu. Qhepatachus qhawarikamunkichej chayqa wañunkichej”, nispa.

Paykuna Zoar llajtaman chayajtinku, Jehová Diosqa Sodoma, Gomorra llajtasman ninata, azufretawan parachimorqa. Ajinamanta chay iskay llajtasqa chinkachisqa karqanku. Lotpa warmintaj mana kasukuspa qhepata qhawarerqa, kikinpitaj kachi pilarman tukorqa. Lotwan warmi wawasninwanqa, paymanta maytachá llakikorqanku Diosta mana kasukuspa kachi pilarman tukuspa wañusqanmanta. Lotwan wawasninwanqa Diosta kasukusqankurayku salvakorqanku. Kaymantataj yachakunchej Jehová Diosta kasukunapuni kasqanta.