Abrahanqa creeyniyoj karqa

Abrahanqa wawan Isaacman yachacherqa Jehová Diosta munakuyta, tukuy ima nisqanpi atienekuyta ima.

Isaac 25 watasniyoj kashajtintaj, Jehová Diosqa Abrahanman nerqa: “Ancha munasqa kʼata wawayki Isaacta pusariykukuspa Moria jallpʼaman riy. Chaypitaj wawaykita jaywawanki qʼolachina ofrendata jina”, nispa. Chay kamachisqanta juntʼayqa mana atinanpaj jinallachu karqa. Chantapis Abrahanqa mana yacharqachu imaraykuchus Jehová Dios chayta nisqanta. Jinapis payqa kasukorqa.

Qʼayantintaj Abrahanqa tutamanta jatarispa iskay kamachisninta, wawan Isaactawan pusarqa Moria jallpʼaman. Kinsa diata puriytawantaj, karumanta orqosta rikorqanku. Abrahantaj kamachisninman nerqa: “Kayllapi qhepakuychej, wawaywan risaj Diosman qʼolachina jaywanata jaywanaypaj”, nispa. Abrahanqa cuchillota aparqa, wawantaj llantʼata qʼeperqa. Rishajtinkutaj Isaac taporqa: “¿Maytaj oveja qʼolachinapajri?”, nispa. Abrahantaj nerqa: “Qʼolachina ofrendapaj ovejataqa Diosninchej qollawasun wawáy”, nispa.

Orqoman chayaspataj altarta ruwarqanku. Abrahantaj Isaacta altarman siriykucherqa makisninta, chakisnintawan wataykuspa.

Abrahán cuchillota oqharishajtin, Diospa angelnin cielomanta nimorqa: “Abrahán, ama imanaychu wawaykita. Kunanqa yachani Diospi creesqaykita, imaraykuchus mana kʼata wawallaykitapis michʼakunkichu qonawaykipaj”, nispa. Chantá Abrahanqa rikorqa uj carnerota wajrasninmanta juchʼuy sachʼas ukhupi japʼisqata. Isaacta phaskaraspataj, paypa cuentanmanta chay carnerota qʼolacherqa.

Chaymantapacha Jehová Diosqa Abrahán amigon kasqanta nerqa. Imaraykuchus wakin kamachiykunata mana allinta entiendespapis, Diospa tukuy ima nisqanta kasukorqa.

Jehová Diosqa watejmanta Abrahanman nerqa: “Bendecisqaykipuni, mirayniykitapis ashkhayachisaj”, nispa. Chantá Dios nillarqataj: “Qannejtataj tukuy jallpʼantinmanta kasukoj runaspaj sumaj imasta ruwasaj”, nispa.