Ñaupaj kinsa castigos

Israelitasqa esclavos kasqankurayku sinchʼita trabajarqanku. Chayrayku Jehová Diosqa Moisestawan Aarontawan faraonman kachaspa willacherqa: “Saqey israelita wawasniy chʼin jallpʼaman rinankuta, chaypi yupaychanawankupaj”, nispa. Faraontaj mayta jatunchakuspa nerqa: “Imatapis chay Jehová Dios nichun. Mana israelitasta kachasajchu”, nispa. Chantá faraonqa israelitasta astawanraj trabajacherqa. Chayrayku Jehová Diosqa chunka castigosta Egiptoman apacherqa. Jehová Dios Moisesta nerqa: “Faraonqa mana kasuwanchu. Payqa sutʼiyayta Nilo mayuman renqa. Chaypi payta nimuy israelitasta mana kacharisqanrayku Nilo mayu yawarman tukunanta”, nispa. Moisesqa Diosta kasukuspa faraonwan parlamorqa. Faraonqa Aaronta rikorqa mayupi yakuta tojnunwan wajtasqanta, yakutaj yawarman tukusqanta. Chantá chay mayoqa millayta qʼaparerqa, pescadospis wañurarqanku. Yakoqa niña tomanapaj jinachu karqa. Jinapis faraonqa nipuni munarqachu israelitasta kachariyta.

Qanchis diasninmantaj, Jehová Diosqa Moisesta watejmanta faraonman kacharqa, kayta ninanpaj: “Manachus israelitasta llojsejta saqenki chayqa, Egiptoman kʼaylankulasta juntʼaykuchimusaj”, nispa. Aaronqa faraón mana kasukusqanrayku tojnunta oqharerqa, kʼaylankulastaj tukuynejman juntʼaykorqanku, wasisman, camasman, mikhuna platosman ima. Chayrayku faraonqa Moisesman nerqa: “Jehová Diosmanta mañay kay castigota chinkachinanta, chantá israelitasta kachapusaj”, nispa. Chantá Diosqa kʼaylankulasta wañuracherqa, runastaj may chhika montonesta tantarqanku. Egipto jallpʼaqa millayta asnarerqa. Jinapis faraonqa nipuni israelitasta kacharerqachu.

Chantá Jehová Diosqa Moisesman nerqa: “Aarón tojnunwan jallpʼata wajtachun, oqharikoj jallpʼataj zancudosman tukonqanku”, nispa. Ajinapunitaj karqa, zancudosqa tukuynejpi kasharqanku. Egiptomanta wakin runaspis faraonta nerqanku chay castigoqa Diosmanta jamusqanta. Jinapis faraonqa nipuni israelitasta kachaporqachu.