Sojta castigospiwan

Moiseswan Aaronwanqa faraonman nimorqanku: “Diosqa nin: ‘Manachus saqenki israelitasta llojsejta chayqa, khanikoj chʼuspista kay jallpʼaman apachimusaj’, nispa”. Chantá may chhika khanikoj chʼuspis tukuynin Egiptoman juntʼaykorqa. Israelitas tiyakusharqanku chay Gosén jallpʼapitaj, ni ujpis karqachu. Israelitasmanqa ñaupaj kinsa castigoslla chayarqa. Faraonqa Moisesman nerqa: “Jehová Diosmanta mañay kay chʼuspista chinkachinanta. Chanta ripojta saqesqaykichej”, nispa. Jehová Dios chʼuspista chinkachisqantawantaj, faraonqa manapuni Diosta kasorqachu.

Jehová Diosqa nerqa: “Manachus faraón israelitasta kacharenqa chayqa, egipciospa animalesninku onqoykuspa wañonqanku”, nispa. Qʼayantintaj ajinapuni karqa. Israelitaspa animalesnillanku mana wañorqankuchu. Faraonqa may kasqanta yuyakorqa, chayraykutaj Diosta mana kasorqachu.

Chantá Jehová Diosqa Moisesta faraonman kachallarqataj, nerqataj qhechimichata apakuspa faraonpa ñaupaqenpi qhallananta. Chaytaj ñutʼu jallpʼaman tukuspa tukuynejman juntʼaykorqa, runaspi, animalespi imataj, sarnasta rikhuricherqa. Jinapis faraonqa watejmanta israelitasta jarkʼallarqataj.

Jehová Diosqa Moisesta faraonman kachallarqataj. Moisés nerqa: “Diosqa nin: ‘Llajtayta manarajpuni kacharisqaykirayku qʼaya granizota parachimusaj’, nispa”. Qʼayantintaj Diosqa ninata, granizota ima paracherqa, rayospis manchayta sonarerqa. Chay jina parataj ni jaykʼajpis Egiptopi karqachu. Chay granizoqa sachʼasta, chajrastapis qʼara kʼaspillata saqerqa, Gosén jallpʼamantaj mana chayarqachu. Chantá faraonqa Moisesman nerqa: “Granizota kitachinanta Diosmanta mañakuy, ripunkichejtaj”, nispa. Granizo pasasqantawantaj, faraonqa mana israelitasta kachariyta munarqachu.

Moisestaj nerqa: “Kunanqa langostas mikhukaponqanku granizomanta qhepakorqa chay imasta”, nispa. Chantá may chhika langostas granizomanta puchoj imasta mikhukaporqanku. Faraonqa Moisesman nerqa: “Jehová Diosmanta mañakuy langostasta chinkachinanta”, nispa. Langostas chinkajtintaj, faraonqa nipuni israelitasta kacharerqachu.

Jehová Diosqa Moisesta nerqa: “Makiykita cieloman oqhariy”, nispa. Makinta oqharisqantawantaj laqhayaykorqa. Egipciosqa tuti laqhapi karqanku kinsa diata. Jinapis israelitas tiyakusharqanku chaynejpeqa kʼanchay kakusharqa.

Faraonqa Moisesta nerqa: “Qanwan llajta masisniykiwan riyta atinkichej, animalesnillaykichejta saqeychej”, nispa. Moisestaj nerqa: “Diosniykuman qʼolachinaykupajqa animalesniykupis renqanku”, nispa. Faraontaj mayta phiñakuspa qhaparerqa: “Riy kaymanta. Kutimunki chayqa wañuchisqayki”, nispa.