Nisqankuta mana juntʼankuchu

Jehová Diosqa Moisesman nerqa: “Orqoman wicharimuy. Pʼalta rumispi leyesniyta qhelqasaj, chaytataj qosqayki”, nispa. Moisesqa orqoman wicharerqa, chaypitaj karqa 40 diasta 40 tutastawan. Jehová Diostaj iskay pʼalta rumispi Chunka Kamachiykunata qhelqaspa Moisesman qorqa.

Israelitastajrí Moisés ripusqanta yuyaspa Aaronta nerqanku: “Uj runata churapuwayku pusanawaykupaj. Uj diosta ruwapuwayku”, nispa. Aarontaj nerqa: “Orota apamuychej”, nispa. Chantá chay orota unuyachiytawan waka uñaman rijchʼakoj santota ruwarqa. Runastaj nerqanku: “Kaymin Egiptomanta orqhomuwarqanchej chay diosqa”, nispa. Chantá fiestata ruwaspa chay santota yupaycharqanku. Chaytaj mana allinchu karqa. Imajtinchus Jehová Diosllata yupaychasqayku nisqankuta mana juntʼasharqankuchu.

Jehová Diosqa chayta rikuspa Moisesman nerqa: “Uraykuy, israelitasqa mana kasuwaspa uj santota yupaychashanku”, nispa. Moisestaj orqomanta uraykamorqa iskay pʼalta rumis marqʼarisqa.

Uraykamushaspataj israelitaspa takisqankuta uyarerqa. Chantá tusurispa uj santota yupaychashasqankuta rikorqa. Moisesqa manchayta phiñakorqa, japʼisharqa chay rumistapis pampaman choqaspa tʼunarparerqa. Chantá chay rato chay santota kutarparerqa, Aarontataj taporqa: “¿Imanasorqankutaj kay jina jatun juchata ruwanaykipajri?”, nispa. Aarontaj nerqa: “Ama phiñakuychu, yachanki imaynachus kasqankuta. Paykunaqa uj diosta munarqanku, chayrayku orota ninaman churaykorqani, jinamanta kay waka uña rikhurin”, nispa. Aaronqa mana chayta ruwananchu karqa. Chantá Moisesqa orqoman kuterqa, israelitaspajtaj perdonta mayta mañakorqa.

Jehová Diosqa kasukuyta munaj israelitasta perdonarqa. Paykuna Jehová Diosta, Moisesta kasunankoqa allinninkupajpuni karqa.