40 yachachiy
Moisés chhankata waqtan
CHAYMANTA ¡10 wata, 20 wata, 30 wata, 39 watataña israelitakuna chʼin jallpʼallapi kachkarqanku! Chaywanpis tukuy kay watakunapiqa Jehovaqa llaqtanta jarkʼarqa. Maná nisqata kawsanankupaq qurqa. Pʼunchayqa juk phuyuwan llaqtata pusaq, chʼisintaq juk nina lawraywan. Pʼachanku mana thantakurqachu, nitaq chakisninkupis imanakurqachu.
Chay killapi Egiptomanta lluqsisqankumantapacha 40 wata qallarirqa. Watiqmanta israelitakuna Cadespi kachkarqanku. Tawa chunka wata ñawpaqta kaymanta 12 qharita Canaanta watiqaq kacharqanku. Kayllapitaq María Moisespa panan wañupurqa. Kunanpis unayjina thutullarqankutaq.
Runaqa mana yakuta tariyta atirqachu. Chayrayku thutuspa Moisesman nirqanku: ‘Allin kanman karqa wañunayku. ¿Imapaqtaq Egiptomanta kay chʼin pampaman urqhumuwaykuri? Kaypiqa mana imata tarpuyta atiykuchu; mana higos, uvas, nitaq granadas sachʼaspis kanchu. Yakupis ukyanapaq mana tarikunchu’, nispa.
Moisés Aaronwan toldoman mañakuq riptinku, Jehová Moisesman nirqa: ‘Israelitasta tantachiychik. Jinaspataq, paykuna rikuchkaptinku chhankata parlapayay, yakutaq phullchimunqa tukuy llaqta, uywasninkupis yakuta ukyanankupaq’, nispa.
Chaymanta Moisés runata tantaykuspa nirqa: ‘¡Uyariychik, mana Diospi atienekuqkuna! ¿Kay chhankamantachu yakuta urqhusqayku?’, nispa. Chaymanta, Moisés 2 kutita chhankata tuqnunwan waqtaptintaq, tukuy runapaq animalkunapaq ima yaku phullchurimurqa.
Jehovaqa Moiseswan Aaronwan ima mayta phiñakurqa. ¿Imaraykutaq? Moisés Aaronwan, ñuqayku yakuta urqhusqanku nisqankurayku. Chaywanpis Jehová yakuta urqhurqa. Moisés Aaronwan mana chiqata parlasqankurayku, Jehová jasutʼinanta nirqa: ‘Kay llaqtayta mana Canaán jallpʼaman qamkuna pusaykunkichikchu’, nispa.
Chaymanta israelitakunaqa Cadesmanta lluqsirqanku. Hor urqumantaq chayarqanku. Chaypi Aarón 123 watayuq kachkaspa wañupurqa. Israelitakunaqa mayta phutikurqanku, 30 pʼunchayta Aaronmanta waqarqanku. Kunantaq Eleazar Aaronpa churin Israel llaqtapaq kuraq kaq sacerdote karqa.
Números 20:1-13, 22-29; Deuteronomio 29:5.