43 yachachiy

Josué llaqtata kamachin

MOISÉS Canaanman israelitaswan yaykuyta munarqa. Chayrayku nirqa: ‘Jehová, Jordán mayuta chimpachillaway, chay kʼacha jallpʼata rikunaypaq’, nispa. Jehovataq kutichin: ‘¡Kaykamalla qamwanqa! ¡Amaña chaymanta parlawaychu!’, nispa. ¿Imaraykutaq Jehová jinata kutichirqa?

Moisés chhankamanta yakuta urqhuni nisqanrayku. Yuyarinkichu: Moisés Aaronwan mana Diosta jatuncharqankuchu. Mana llaqtaman Jehová yakuta urqhusqanta willarqankuchu. Chayrayku Jehová mana munarqachu Canaanman yaykunankuta.

Aarón wañupusqanmanta, Jehová Moisesta nirqa: ‘Josueta akllaspa sacerdote Eleazarpa ñawpaqinpi churay. Chaypitaq, tukuypa ñawpaqinpi, Josué kunanmantapacha kamachisunqachik, ninayki tiyan’, nispa. Dibujitupi rikunkijina Moisesqa Jehovata kasukurqa.

Chanta Jehová Josueta nirqa: ‘Kallpachakuy, ama manchakuychu. Qam israelitasta pusaykachanki, Canaán jallpʼaman parlasqaymanjina apaykunki, ñuqa mana saqisqaykichu’, nispa.

Chanta Jehová Moisesta, Moab jallpʼapi, Nebo urquman wicharinanta nirqa. Chaymanta, Jordán mayumanta astawan jaqayman, kʼacha jallpʼa Canaanta qhawayta atirqa. Jehová nirqa: ‘Kay jallpʼata Abrahampa, Isaacpa, Jacobpa, mirayninman ima, qunaypaq parlarqani. Qamta rikuchiyki, chaywanpis chaymanqa mana yaykuchisqaykichu’, nispa.

Moisés 120 watayuq Nebo urqupi wañupurqa. Wapuraq kachkarqa, ñawisninpis manaraq ayphuyarqachu. Llaqtaqa mayta llakikurqa, tukuytaq Moisesmanta waqarqanku. Chaywanpis Josué llaqtamanta kamachiq kasqanrayku kusikurqanku.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.