38 yachachiy
Chunka iskayniyuq watiqaqkuna
QHAWARIY kay runakuna japʼichkasqankuta. Qhawariy chay uvasta, iskay qhari juk kʼaspipi japʼinanku tiyan. Higota, granadata ima qhawarillaytaq. ¿Maymanta kay sumaq puquykunata apamurqanku? Canaán jallpʼamanta. Yuyarinkichu Abraham, Isaac, Jacob ima, Canaanpi tiyakusqankuta. Jacobqa juk yarqhay kasqanrayku familiantin Egiptoman ripurqa. Kunantaq 216 watanman, Moisés israelitasta Canaaman kutichirqa. Israelitasqa Cades chʼaki jallpʼapi chachkarqanku.
Canaán jallpʼapiqa saqra runas tiyakurqanku. Chayrayku Moisesqa 12 runata watiqaqta kacharqa: ‘Achkhachus atiyniyuqchus kasqankuta qhawamuychik. Jallpʼapis tarpunapaq sumaqchus kasqanta qhawamuychik. Manataq puquykunata apamuyta qunqaychikchu’, nispa.
Watiqaqkuna Cadesman kutiytawan Moisesta nirqanku: ‘Chiqamanta chay llaqtaqa may sumaq kasqa’, nispa. Chayta rikuchinankupaqtaq puquykunata aparqanku. Chanta 10 watiqaqkunaqa nirqanku: ‘Chaypi tiyakuqkuna may jatuchaq, may kallpayuqtaq kanku. Llaqtanta qhichunayaptinchikqa, wañuchiwasunchik’, nispa.
Israelitas kayta uyarispaqa mancharikurqanku. ‘Allin kanman karqa Egiptopi wañunanchik, chayri chʼin pampapipis. Kunanqa maqanakuypi wañusunchik, chantapis warmisninchik, wawasninchik ima, japʼichikunqanku. ¡Moisés kananmantaqa, juk kuraq runata akllanachik, Egiptoman kutipunapaq!’, nispa nirqanku.
Iskay watiqaqkunaqa Jehovapi suyakurqanku. Llaqtata thasnuchiyta munarqanku. Paykuna Josué, Caleb sutikunku, nirqankutaq: ‘Ama manchachikuychikchu. Jehová ñuqanchikwan kachkan. Atillasunchik atipayta’, nispa. Llaqtaqa mana uyarispa, Josueta Calebtawan wañuchinayarqanku.
Jehovaqa mayta phiñakurqa, chayrayku Moisesta nirqa: ‘Mana pipis 20 watamanta pataman, nitaq aswan watayuqpis Canaán llaqtaman yaykunqachu. Egiptopi, chʼaki pampapipis milagrosta ruwasqayta rikurqanku, chaywanpis manaraq ñuqapi suyakunkuchu. Chayrayku 40 watata kay chʼaki pampapi purinqanku qhipa kaq wañunankama. Josuella Calebwan Canaán jallpʼaman yaykunqanku’, nispa.