Ashkha caballos, nina carretas ima

Siriamanta rey Ben-Hadadqa ashkha kutispi israelitaswan maqanakoj rerqa. Profeta Eliseotajrí rey Ben-Hadad rishasqanta yachaytawan, Israelpa reyninman ayqekunanpaj willamullajpuni. Chayraykutaj Ben-Hadadqa Eliseota japʼiyta munarqa. Chayrayku Dotanpi kashasqanta yachaspa, soldadosninta kacharqa japʼimunankupaj.

Soldadostaj Dotanman tuta chayarqanku. Qʼayantintaj Eliseoj kamachenqa tutamanta llojsimuspa ashkha soldadosta llajtaj muyuyninpi rikorqa. Mancharikuspataj nerqa: “Ay Eliseo, ¿imanasuntajri?”, nispa. Eliseotaj nerqa: “Noqanchejwan kajkunaqa aswan ashkha kanku, paykunawan kajkunamanta nisqaqa”, nispa. Chay ratopachataj Jehová Diosqa Eliseoj kamachinpa ñawisninta kicharerqa. Kamachintaj orqospi rikorqa may chhika soldadosta caballospi, laurarishaj maqanakuna carretaspi ima.

Chay soldadosqa Eliseota japʼiyta munarqanku. Chayrayku Eliseoqa orakorqa: “Diosníy, ama jina kaspa, kay runasta ciegoyachiy”, nispa. Chay soldadostaj manaña repararqankuchu maypichus kashasqankuta. Eliseotaj nerqa: “Pantaykamunkichej, kayqa mana chay llajtachu. Jaku, noqa pusasqaykichej maskʼashankichej chay runaman”, nispa. Paykunataj Eliseota qhaterqanku Samariakama. Chay llajtapeqa Israelpa reynin tiyakoj.

Soldadostaj Samariapi kashasqankuta reparakorqanku, nitaj imatapis ruwayta aterqankuñachu. Israelpa reynintaj Eliseota taporqa: “¿Wañuchisajchu kay runasta?”, nispa. Eliseotajrí Siriamanta soldados sufrichiyta munajtinkupis, mana vengakorqachu, nerqataj: “Ama wañuchiychu. Mikhunata qospa kachapuy”, nispa. Chayrayku reyqa uj jatun mikhuyta waykʼucherqa, mikhurachiytawantaj kachaporqa.