Diosman qayllaykuy

“Kayqa churiyki”

2 Reyes 4:8-37

JUK wawa wañupuptinqa, manchay llakiy tatasninpaqqa. Chaywanpis, Jehová Diosqa, chay llakiyta chinkachiyta atin. Ñawpa tiempopiqa, wakin runasniqta, wañusqasta kawsarichimuyta atisqanta rikuchirqa. Jukninqa, Eliseo. Imaynatachus kay runa, juk wawitata kawsarichisqanta 2 Reyes 4:8-37 qhawarisun.

Sunem llaqtapi, juk qhariwarmi, Eliseota wasinkuman waqyarikuq kanku. Juk pʼunchayqa, Eliseo paykunaman agradeceyta munaspa, warmiman nirqa: “Wata kunan jina, wawata marqʼaykachashanki”, nispa. Warmitaq, mana wawayuq kayta atisqanrayku, chay nisqanta mana creerqachu. Tiemponmantaq, Eliseop nisqanmanjina, chay warmiqa wiksallisqa rikhurirqa. Jina kaptinpis, kusiyninqa mana unaypaqchu karqa. Imaraykuchus pisi watasninman, wawitaqa, uma nanaywan mamanpa muqun patapi wañupurqa (16, 19, 20, pʼitikuna). Chantá chay warmiqa, wawanta Diospa profetan Eliseop cuartonman apaspa, puñunan pataman churaykurqa.

Chantá, qusanta tapuytawan, Eliseota usqhayllata maskʼaq rirqa. Kimsa chunka kilometrosta puriytawan, Carmelo urquman chayarqa. Maypichus Eliseo kachkarqa. Tʼukunapaqjina kaptinpis, payqa mana waqarqachu. ¿Imaraykutaqrí? ¿Yachanmanchu karqa, Eliseop yachachiqnin profeta Elías, juk viudap wawanta kawsarichisqanta? (1 Reyes 17:17-23.) ¿Creerqachu profeta Eliseo, wawitanta kawsarichimunanta? Chaytaqa, mana yachanchikchu. Chaywanpis, warmi mana wasinman kutirqachu, Eliseo paywan kutinankama.

Profeta Eliseoqa, chayaytawan, cuartonman yaykurqa. Chaypitaq, “wawaqa paypa puñunan patapi wañusqa wijchʼukusharqa” (32 pʼiti). Diosmanta tukuy sunquwan mañakurqa. Chantataq, abrazaykuspa “wawaj cuerponta qʼoñicherqa” (34 pʼiti). Chay ratopacha, wawap sunqitun watiqmanta samayta qallarirqa. Mamantaq, Eliseo “kayqa churiyki” niptin, ¡maytachá kusikurqa! (36 pʼiti, Diospa Simin Qelqa.)

Chiqamantachá, pikunaptachus wawitanku wañupun paykunaqa, kayta Bibliapi ñawirispa, sunquchakunku. Jehovaqa, paykunap, sunqu nanayninta allinta yachan. Payqa, chay wawasta, may chhika wañupuq runasta ima, kawsarichimuyta munan (Job 14:14, 15). Jehová kay jinata runasta kawsarichimusqanqa, rikuchiwanchik imaynasmantawanraqchus musuq pachapi ruwanqa.a

Pillapis familianchikmanta wañupuptinqa, manchay llakiypuni. Chayrayku juk hermano, piqpatachus kʼata wawan wañupurqa, nirqa: “Llakiyniyqa, maypachachus wawayta watiqmanta rikuptillay chinkanqa”. Jina kaptinpis, wañupup familianchik chayri amigonchik kawsarimunanta yachayqa, mayta sunquchawasunman. Tʼukuriy, ¡paykunata watiqmanta rikuspa abrazaykuchkankimanpisjina! Chaypi tʼukuriyqa, nanayninchikta pisiyachinman. Kay sumaq suyakuytaqa, Jehová Diosninchik quwanchik. Chayrayku, payman qayllakuna.

[Sutʼinchaynin]