Uj ángel Ezequiasta yanapan

Asiriamanta soldadosqa Israelpa 10 ayllusninta japʼikaporqanku. Rey Senaqueribtaj Asiria suyuta kamachishaspa Judapi kaj iskay ayllusta japʼikapuyta munarqa. Chayrayku Judapi kaj llajtasta ujmanta uj japʼikapuyta qallarerqa. Payqa Jerusalenta astawan japʼikapuyta munarqa. Jinapis mana yacharqachu Jehová Dios chay llajtata qhawashasqanta.

Judamanta rey Ezequiasqa, ashkha qolqeta Senaqueribman pagarqa Jerusalenta mana japʼikapunanpaj. Jinapis Senaqueribqa soldadosninta kacharqa Jerusalenta japʼikapunankupaj. Chay soldados Jerusalenman astawan qayllaykojtinkutaj, chay llajtamanta runasqa mancharikorqanku. Chayrayku Ezequías runasman nerqa: “Ama manchachikuychejchu. Asirios noqanchejmanta astawan kajtinkupis, Jehová Dios kallpata qowasun atipanapaj”, nispa.

Senaqueribqa kamachin rabsaqueta Jerusalenman kacharqa. Paytaj Jerusalenpi runasmanta asikorqa, qhaparerqataj: “Jehovaqa mana salvayta atisonqachejchu. Ama Ezequiaswan engañachikuychejchu. Ni pi diospis makiykumanta salvasonqachejchu”, nispa.

Ezequiasqa Diosta tapurerqa imatachus ruwananta. Jehová Diostaj nerqa: “Ama manchachikuychu. Ama uyariychu rabsaqueta. Senaqueribqa mana Jerusalenta japʼikaponqachu”, nispa. Chantá Ezequiasman Senaqueribpa cartasnin chayarqa. Chaypitaj nisharqa: “Kamachisnillaykuña kaychej. Jehovaqa mana salvasonqachejchu”, nispa. Chantá Ezequiasqa orakorqa: “Jehová Diosníy, salvawayku ari, ajinamanta tukuy runas yachanqanku qanlla Dios kasqaykita”, nispa. Diostaj nerqa: “Asiriamanta reyqa mana Jerusalenman yaykumonqachu. Noqa yanapasqaykichej”, nispa.

Senaqueribqa Jerusalenta uj imata jina japʼikapunanta yuyasharqa. Jinapis uj chʼisi, Jehová Diosqa asirios kasharqanku chayman uj angelta kacharqa. Chay angeltaj 185.000 soldadosta wañucherqa. Chayrayku rey Senaqueribqa may llakisqa kutiporqa. Ajinata Jehová Diosqa nisqanman jina Ezequiasta, Jerusalentapis jarkʼarqa. Jerusalenpi kashawaj karqa chay, ¿Jehová Diospi atienekuwajchu karqa?