Wiñaypaj sayaj Gobierno

Uj chʼisi, Nabucodonosorqa fierota mosqokuspa niña puñuytapis aterqachu. Chayrayku yatirista, yachayniyojkunata ima wajyachispa nerqa: “Imatachus mosqokusqayta niwaychej”, nispa. Paykunataj nerqanku: “Reyníy, mosqoyniykita willariwayku”, nispa. Reytaj nerqa: “Mana, qankuna willanawaykichej tiyan, manaqa wañuchisqaykichej”, nispa. Paykunataj watejmanta kikillantataj nerqanku. Reytaj nerqa: “Ama rabiachiwaychejchu. Mosqokusqayta willawaychej”, nispa. Paykunataj nerqanku: “Ni pipis chayta ruwayta atinmanchu”, nispa.

Reytaj mayta phiñakuspa nerqa yachayniyojkunata, yatirista ima wañuchinankuta. Danielpis, Sadracpis, Mesacpis, Abednegopis wañuchisqallataj kananku karqa. Chayrayku Danielqa reymanta uj pisi tiempota mañakorqa. Chantá Danielwan amigosninwan Jehová Diosmanta yanapata mañakorqanku. Diostaj paykunata yanaparqa.

Diosqa mosqoypi jina Danielman rikucherqa Nabucodonosorpa mosqoyninta, sutʼincharqataj imachus niyta munasqanta. Qʼayantintaj Danielqa reypa kamachinman nimorqa: “Ama pitapis wañuchiychejchu, noqa sutʼinchasaj reypa mosqoyninta”, nispa. Chay kamachitaj Danielta reyman pusarqa. Danieltaj reyman nerqa: “Diosqa rikuchisunki imaschus kananta. Qanqa mosqoyniykipi rikorqanki uj jatun lantita. Chay lantej umanqa oro puromanta karqa, pechonwan makisninwantaj qolqe metalmanta karqanku, wijsanwan piernasninwantaj cobremanta karqanku. Chaki tʼususnenqa fierromanta karqa, chakisnintaj fierrowan tʼuruwan chajrusqa karqanku. Chantá orqomanta uj rumi urmamuspa chakisninta phirirparerqa, chaytataj wayra apakaporqa ni imata puchuchispa. Chay lantiman chayaj rumitaj uj jatun orqoman tukorqa, jallpʼantinmantaj juntʼaykorqa”, nispa.

Chantá Daniel nerqa: “Rikorqanki chay lantej qori umanqa gobiernoykiwan ninakun. Qolqetaj qhepaykipi kaj gobiernowan ninakun. Cobretaj tukuy jallpʼata kamachenqa chay gobiernowan ninakun. Qhepan gobiernotaj fierro jina kanqa. Chaypa qhepanpi kaj gobiernotaj khuskan fierro jina kanqa, khuskantaj tʼuru jina. Uj orqoman tukoj rumitaj Diospa Gobiernon. Chaytaj tukuy chay gobiernosta chinkachispa wiñaypaj sayanqa”, nispa.

Nabucodonosorqa Danielpa ñaupaqenpi pampakama kʼumuykukuspa nerqa: “Diosniyki mosqoyniyta sutʼinchasunki. Mana waj dios kanchu pay jinaqa”, nispa. Chantá Danielta churarqa yachayniyojkunaj kamachejninku kananpaj, Babiloniapi uj kamachej kananpaj ima. Jehová Diosqa Danielpa mañakusqanta uyarerqa.