Diabloqa Jesusta pantachiyta munan

Jesustaqa bautizakusqantawan espíritu santo chʼin lugarman pusarqa. Chaypitaj Jesusqa 40 diasta ni imata mikhorqachu. Chayrayku Diabloqa juchaman urmachiyta munaspa nerqa: “Diospa wawanchus kanki chayqa, niy kay rumista tʼantaman tukunankuta”, nispa. Jesustaj nerqa: “Qhelqasqa kashan runaqa mana tʼantallawanchu kausanqa, manaqa Diospa siminmanta llojsimoj palabraswan”, nispa.

Diabloqa Jesusta ujtawan nillarqataj: “Diospa wawanchus kanki chayqa, temploj aswan pata lugarninmanta uraman wijchʼuykukuy. Qhelqasqa kashan, Diosqa angelesninta kachamusonqa salvasunankupaj”, nispa. Jesustaj nerqa: “Qhelqasqallataj kashan: ‘Jehová Diosniykitaqa ama pruebaman churankichu’, nispa”.

Supayqa Jesusta pantachiytapuni munaspa, jallpʼantinmanta llajtasta, qhapaj kaynintawan rikuchispa nerqa: “Qonqoriykukuspa yupaychawanki chayqa, kay tukuy imasta qopusqayki”, nispa. Jesustaj nerqa: “¡Riy kaymanta Satanás! Qhelqasqa kashan: ‘Jehová Diosllata yupaychanayki tiyan’, nispa”.

Diablotaj riporqa, angelestaj jamuspa Jesusman mikhuyta qorqanku. Chantá Jesusqa Diospa Gobiernonmanta predicayta qallarerqa. Imajtinchus chaypaj Jehová Dios jallpʼaman kachamusqa. Runastaj Jesusta uyariyta munaj kanku, chayrayku Jesuspa qhepanta purej kanku.