Jesús ashkha runasman mikhuchin

32 watamanta Pascuapaj pisi tiempollaña faltashajtin, apostolesqa willamusqankumanta kutimorqanku. Paykunaqa saykʼusqa kasharqanku. Chayrayku Jesusqa paykunata Betsaidaman pusarqa chaypi samarikunankupaj. Betsaidaman canoapi chayaspataj, Jesusqa qocha kantupi ashkha runasta rikorqa. Paykunaqa qhepanta risqanku. Jesusqa apostoleswan samarikuyta munaspapis, diantinta Diospa Gobiernonmanta ashkha imasta yachacherqa, onqosqastapis sanoyacherqa. Tardeyaykushajtintaj apóstoles payman nerqanku: “Runasqa yarqhasqachá kashanku. Kachapullayña mikhunata rantikamunankupaj”, nispa.

Jesustaj apostolesninman nerqa: “Mana kachapusunmanchu. Qankuna mikhunata qoychej”, nispa. Paykunataj nerqanku: “¿Paykunapaj tʼantata rantimunaykutachu munanki?”, nispa. Felipetaj nerqa: “Ashkha qolqeyoj kaspapis, mana kay tukuynin runaspaj mikhunata rantiyta atisunmanchu”, nispa.

Jesustaj nerqa: “¿Imataj mikhunapaj tiyan?”, nispa. Andrestaj nerqa: “Phishqa tʼantaswan, iskay pescadosllawan. Chayqa ancha pisi”, nispa. Jesustaj nerqa: “Chaykunata apamuwaychej”, nispa. Chantá runasta nerqa: “Pasto patapi tiyaraychej. Sapa qotupi 50 chayri 100 runas”, nispa. Chaymantataj pescadosta, tʼantastawan oqharispa cielota qhawarerqa, Diosmantaj graciasta qorqa. Chantá partiraspa apostoleswan runasman jaywacherqa. Chaytaqa mikhorqanku sajsakunankukama 5.000 qharis, mana yupaspa warmista, nitaj wawastapis. Apostolestaj puchojta 12 canastas juntʼata tantarqanku mana usunanpaj. Chay milagroqa tʼukunapaj karqa.

Chayrayku runasqa munarqanku Jesús reyninku kananta. Jehová Diostajrí mana munarqachu rey kananta manaraj tiempochu kasqanrayku. Jesustaj chayta yacharqa. Chayrayku runasta kachaporqa, apostolesnintataj Galilea qocha chimpaman kacharqa. Apostolesqa canoapi riporqanku, Jesustaj sapallan orqoman rerqa Tatanmanta mañakunanpaj. Jesusqa ashkha ruwanasniyoj kaspapis, Tatanmanta mañakunanpaj tiempochakojpuni.