Entiendenapaj jina yachachiy

Jesuspa ruwasqan

VIDEO: Jesusqa Jehová cuidawasqanchejta uj kikinchaywan yachachin

1. VIDEOTA qhawariy chayri Mateo 6:25-27 leeriy. Chantá kay tapuykunapi tʼukuriy:

1. ¿Ima kikinchaywantaj Jesús yachacherqa Jehová cuidawasqanchejta?

2. Jesús pʼisqosmanta ashkha imasta yachaspapis, ¿imaraykutaj entiendenapaj jina imasllamanta parlarqa? ¿Imaraykutaj may allin karqa ajinata yachachisqan?

¿Imatá Jesusmanta yachakunchej?

2. Sichus entiendenapaj jinalla yachachisun chayqa, runas yuyarikonqanku imatachus yachachisqanchejta, chay yachachisqanchejtaj sonqonkuman chayanqa.

Jesús jina ruway

3. Ama anchata parlaychu. Estudioykimanqa imamantapis ama tukuy yachasqaykitachu sutʼinchay, astawanqa imatachus estudiashankichej chayllamanta sutʼinchay. Estudioykita tapuytawanqa kutichinanta pacienciawan suyay. Chanta, ¿imatá ruwawaj estudioyki uj tapuypa kutichiyninta mana yachajtin, chayri mana Bibliaj nisqanman jinachu kutichejtin? Waj tapuykunatawan ruwawaj sumajta piensarispa cheqanta kutichinanpaj. Estudioyki chayta entiendenña chaytaj qhepanman pasaychej.

4. Imastachá estudioyki yachanña, chay imaswan yanapachikuy mosoj imasta entiendenanpaj. Sichus kausarimuymanta estudianaykichej kashan chayqa, ichapis allin kanman imatachus estudioyki wañusqasmanta yachanña chay imasta tumpata yuyarichinayki.

5. Ima kikinchaykunawanchus yachachinaykita sumajta ajllay. Niraj uj kikinchaywan yachachishaspa tapurikuy:

1. “Kay kikinchay, ¿entiendenapaj jinallachu?”.

2. “¿Estudioy entiendeyta atillanqachu?”.

3. “¿Estudioy imatachus yachachisqayta yuyarikonqachu, chayri kikinchaynillaytachu yuyarikonqa?”.